aron-med-fisk-til-hjemmesideKalaallit Nunaanni eqqumiitsuliorneq – sunaava? Eqqumiitsuliallu qanoq maluginiarneqartarpat, oqaluttuallu suut isumassarsiarisinnaavagut?
Saqqummersitsinermi Kalaallit Nunaanni eqqumiitsuliorneq qitiutillugu sammineqarlunilu oqaluttuarineqassooq. Meeqqanut tulluarsakkamik!
Meeqqat inersimasut peqatigalugit namminneq maluginiutitik atorlugit eqqumiitsuliat sammisinnaavaat oqaluttuaralugillu. Saqqummersitsineq suliassaararpassuarnik paasissutissanillu ilaqutariit, atuarfiit paaqqinnittarfiillu sammisinnaasaannik ulikkaassaaq. Saqqummersitsineq meeqqanut 6-12 ukiulinnut tulluarsagaavoq.
Saqqummersitsinermut atatillugu pingasunngornermi 9. november nal. 15-16 ilinniartitsisunik soqutiginnittunik pikkorissaasoqassooq. Saqqummersitsineq Meeqqanut oqaluttuat – eqqumiitsuliat oqaluttuarisaanerat pikkorissarnermi sammineqassooq, ilinniartitsisutullu eqqumiitsuliorneq pillugu meeqqat qanoq oqaloqatigisinnaanerlugit, taamatullu qanoq meeqqat akorniminni eqqumiitsuliorneq oqaloqatigissutigisinnaaneraat pikkorissaassutigineqassaaq.
Eqqumiitsuliornerup oqaluttuarisaanera ataqatigiissuunngilaq ataasiinnarmik ingerlaarfilik. Eqqumiitsuliornerup oqaluttuarisaanera assigiinngitsorpassuarnik sammiveqarpoq. Eqqumiitsuliorneq inuiaqatigiinni pisunut ikaartitikkatut akuleruteqqasarpoq, piffissamut pitoqqasarluni, nutaanngiliuillunilu iluamik inerneqassanani. Eqqumiitsuliallu pillugit nammineq oqaluttualiortoqarsinnaalluni.
Saqqummersitsineq eqqumiitsuliornerup oqaluttuarisaanera pillugu sisamanik sammiveqarpoq. Nalitsinni eqqumiitsuliorneq, Eqqumiitsuliornermik Ilinniarfiup (taamani Grafisk Værksted-imik taaneqartartoq) ammarneqarnerani 70-ikkunni aallartissimasoq; Qiperukkat, saarnginik, ujaqqanik, qisunnik tuugaanillu sanaat. Titartaaneq qalipaanerlu, Aalut Kangermiup titartagaanit aallartittut; Silataanit ilummut, eqqumiitsuliortut nunani allaninngaanniit Kalaallit Nunaannukarsimasut, eqqumiitsuliorsinnarlutik aallaqqissimasut pillugit.
Eqqumiitsuliat uani saqqummersinneqartut tamagajammik Nuummi Eqqumiitsulianik Saqqummersitsiviup katersaanit tigusaapput, arlallillu siornatigut takutinneqarsimanatik – saqqummersinneqartut ilaat saqqummersitsivimmut atukkiunneqarsimapput.
Saqqummersitsineq 2017-imi maj-ip tungaanut Nuummi Eqqumiitsulianik Saqqummersitsivimmi takuneqarsinnaavoq, Sermeq Fondemillu taperneqarsimalluni.