The Weather Diaries 03.08-18.11 2018

The Weather Diaries 2014-imiilli nunarsuup ilaani saqqummersinneqartareerluni maanna Nuummi saqqummersinneqalerpoq. Saqqummersitsineq aggustip 2-ani  nal. 17 Nuummi Eqqumiitsulianik Saqqummersitsivimmi ammaanersiorneqassaaq.

Saqqummersitsinermi Nunat Avannarliit Killiini mutilerinerup inuiaqatigiinni inissisimanera siunertaalu misissorneqarpoq, ilaatigullu piujuartitsinissaq, sila aamma silap pissusaa, oqaluttuassalerineq, kulturikkut kingornussat, nutaaliornerup pilersarnera, kinaassuserlu ilanngullugit saqqummersitsinermi misissorneqarput.

Nordens Husimit, Reykjavikimiittumit, eqqumiitsuliortunik marlunnik kaamattuinikkut saqqummersitsineq pilersimavoq. Eqqumiitsuliortut taakku tassaapput Sarah Cooper aamma Nina Gorfer. Saqqummersitassaq Nordic Fashion Biennalemi, Frankfurtimi Tysklandimiittumi, 2014-imi saqqumiussassanngorlugu suliarineqarsimavoq. Atisanik ilusilersuisartut Savalimmiuni, Kalaallit Nunaanni Islandimilu pissutsinit, silaminngaanniit, pinngortitamiillu qanoq isumassarsiortarnersut misissuiffigalugit Cooper aamma Gorfer angalasimapput.

Atisanik ilusilersuisartut katillugit 12-it nunani taakkunani pingasuneersut saqqummersitseqataapput, ilaatigut Bibi Chemnitz, Najannguaq Lennert, Nikolaj Kristensen aamma Jessie Kleemann ilaallutik.
Eqqumiitsuliat atisanik ilusilersuisartut oqaluttuaannit, neriuutigisaannit anguniagaannillu tunngaveqarput, silarsuarni sinnattutut takorluukkatullu ittuni saqqummersinneqarlutik. Taamaalilluni saqqummersitsineq oqaluttuanik allaanerusunik pilersitsiffiusinnaalerpoq.

Nuummi Eqqumiitsulianik Saqqummersitsivimmit atisaliortarnermi eqqumiitsuliortarnermilu inuiaassutsikkut tulluussimaartarneq pillugu, The Weather Diaries aqqutigalugu, nutaamik oqallissaarisitsinissaq neriuutigineqarpoq. Neriuutigineqarportaaq sapangaaqqanik amminillu suliaqartariaatsinut tunngatillugu, nutaaliornissamik saqqummersitsineq eqqarsartitsilersinnaassasoq.

Atuartunut ilinniartunullu assinik misissueqqissaarnermi oqaluttuassalerinermilu suliassat saqqummersitsinermut aamma ilaapput. Saqqummersitsinerup ilaa Katuami aggustip pingajuaniit septembarip arferngata tungaanut saqqummiunneqassaaq.

Saqqummersitsineq qaammatini sisamangajanni sivisussuseqassaaq, piffissallu taassuma iluani saqqummersitsinermut tunngasunik aaqqissuussisoqartarumaarpoq.

Saqqummersitsineq novembarip 18-iata tungaanut takusarneqarsinnaassaaq.

ATUARTITSINEQ

The Weather Diaries KAL

The Weather Diaries DK