KIMIK 18.11.16-8.1.17

arnannguaq-hoeegh-ravn

KIMIK – saqqummersitsineq aamma atuakkamik nutaamik saqqummiussineq

Piffissami matumani Nunatsinni eqqumiitsuliorneq qanoq inissisimava? Tassunga tunngasumik pasitsaassisoqarsinnaavoq kalaallit eqqumiitsuliortut peqatigiiffiat KIMIK novembarip 17-ianni nal. 17 Nuummi Eqqumiitsulianut Katersugaasivimmi saqqummersitsinermik ammaanersiorpat. Tassunga atasumik peqatigiiffiup nalliuttorsiorneranut atatillugu atuakkiaq utaqqisaasimasoq assiliartaqarluartorlu saqqummersinneqassaaq, tassani eqqumiitsuliortut ataasiakkaat tamarmik allaaserineqarput.

Eqqumiitsuliortut

Qaqutigoorpoq saqqummersitsinermik kalaallinit eqqumiitsuliortunit arlalinnit assigiinngeqisunillu peqataaffigineqartumik saqqummersitsinermik takusaqassalluni. Saqqummersitsinermi eqqumiitsuliortut 18-it suliaat takutinneqassapput, eqqumiitsuliortut tassaasut: Camilla Nielsen, Kristine Spore Kreutzmann, Lisbeth Karline Poulsen, Ivan Burkal, Lisa Kreutzmann, Buuti Pedersen, Pierre André Auzias, Naja Rosing Asvid, Arnannguaq Høegh, Mike Lynge, Ivalo Abelsen, Miki Jacobsen, Ivínguak Stork Høegh, Julia Pars, Maria Panínlguak Kjærulff, Julie Edel Hardenberg, Peter Kujooq Kristiansen aamma Hari Kristoffersen.

”KIMIK ukiut 20 år”

Maanna ukiuni 20-nngulersuni eqqumiitsuliortut peqatigiiffiat KIMIK kalaallit eqqumiitsuliortarneranni sunniuteqarsimalerpoq. Kimik kalaallisut nukimmik isumaqartinneqarpoq. Tassaavorlu uagutsinni apeqqutaatinneqartoq. Imaanngilaq nipituuliuutaannaasut nukigigivut. Nukitta ilaanniippoq maannakkorpiaq inuuneqarsinnaanerput, nipaassutsimiissinnaanerput itisuumillu anersaartorsinnaanerput.” Buuti Pedersen

Upernaakkut 2015 eqqumiitsuliortut peqatigiiffiat KIMIK 20-nik ukioqalerluni nalliuttorsiorpoq. 1996-imi Kalaallit Nunaanni eqqumiitsuliortut ilinniarsimasut inuillu eqqumiitsuliornermik ingerlatsisut marlunnik siunertaqarlutik kateripput. Siunertaasa siulliat tassaavoq kalaallinik eqqumiitsuliortunik attaveqaqatigiiffimmik pilersitsinissaq, siunertaasa aappaat tassaavoq ukiumut ataasiarlutik eqqumiitsuliortut suliaminnik saqqummersitsisarnissaannik anguniagaq. Atuakkami ”KIMIK ukiut 20 år”, KIMIK-ip oqaluttuarisaanera kingumut qiviarneqarpoq, ineriartornera aamma maannakkut ilaasortat taakkualu eqqumiitsuliaat saqqummiunneqarput. Atuagaq aamma saqqummersitsineq kalaallit eqqumiitsuliornermi silarsuaasa assigiinngissusiat maannamut isikkuat ersersinniarneqarpoq.

Saqqummersitsineq RAL-imit aamma Naalakkersuisumit aningaasaliiffigineqartoq. Saqqummersitsineq 8. januarip tungaanut takuneqarsinnaavoq.