Pinnersaat // 9.10 – 29.12.19

PINNERSAAT kalaallit oqaaseraat, sumulluunniillu pinnersaataasumut kusassaataasumullu atorneqartarluni.

Oqaaseq taanna qulequtaralugu Nuuk Nordisk Kulturfestivalip ingerlanerani Nuummi Eqqumiitsulianik Saqqummersitsivimmi saqqummersitsisoqassaaq, 8. oktobari nal. 17 aallarnerfigalugu.

Saqqummersitsinermi Kalaallit Nunaanni pinnersaasiornikkut killiffik takutinniarneqassaaq, pinnersaasiortut Karen Fly, Kim Eriksen, Hanne Bruun, Kristine Spore Kreutzmann, Nicolai Appel, Nadja Kreutzmann aamma Buuti Pedersen saqqummersitsisoralugit. Saami norgemeersoq Maret Anne Sara, islandimioq eqqummiitsuliortoq Helga Mogensen, kalaaleq eqqumiitsuliortoq Jessie Kleemann aamma eqqumiitsuliortut canadamiut marluk Lavinia Van Heuvelen aamma Caroline Blechert tamarmik immikkut misileraallutik suliaminnik takutitsissapput, pinnersaatip eqqumiitsuliallu killingi misilerarlugit.

Pineqartut tamarmik suliarineqarnermikkut qaffasissumik pitsaassuseqarput, pinnersaatiniit nalinginnaasuniit, soorlu kalaallit kuultiat rubinillu atorlugit sulianiit tuttup alleruinik sapannganillu pinnersaasianut nikerarlutik.