ERFALASOQ Jacob Borges

Ataasinngorneq maajip 18-iat tassaavoq Katersugaasiviit Ulluat. Ulloq taanna Nuummi Eqqumiitsulianik Saqqummersitsiviup eqqumiitsuliortullu Gudrun Haslep suleqatigillutik ingerlataanni ERFALASOQ//FLAG-imi eqqumiitsuliorluni erfalasuliaq nutaaq Holmip Illluani amuneqassaaq nal. 12.

”Ullaakkut erfalasulertarneq, unnulernerani peertarlugu, aqaguanilu erfalasuleqqittarneq. Uteqattaartuarpugut – aamma eqqumiitsuliortutut. Inuunerup ilagiinnarpaa. Uteqattaarineq toqqissisimanermik tunniussisarpoq. Ilitsoqqussat ileqquliuutillu inuunitsinni uivernarfeqartaqisumi naleqqatut aallaavissatullu atortarpagut. Allaat sianiginngisatsinnik iliuuserisartakkagut uteqattaartakkagut, iliuuserineri tamaasa peqqissimissutigisartakkagut, immitsinnut ilisimanitsinnut attuumassuteqarmata sianiginngisatsinnik uteqattaartagaraagut.”

Eqqumiitsuliortup Jacob Borgesip erfalasuminut aallartiffini taamatut nassuiarpaa. Holmip Illuani 2020mi eqqumiitsuliatut erfalasuliani arfiniliusuni amuneqartussani Jacob Borgesip erfalasuliaa siulliussaaq. Gudrun Haslep  Nuummi Eqqumiitsulianik Saqqummersitsiviullu ERFALASOQ//FLAG 2019imi suleqatigiillutik aallartippaat. 2019imi eqqumiitsuliortut tallimat eqqumiitsulianik erfalasuliornissamut qaaqquneqarput. Erfalasut assigiinngitsunik isumaqarfigineqartut, minnerunngitsumik avatangiisiminnut aamma erfalasup suunerannut eqqarsaatersuuteqalersitsisut. Erfalasut qungujutsitsipput, tupigusutsitsillutik, isumalioqqissaartitsillutik, allaat mamiatsannermik pilersitsisimallutik. Kikkut tamarmik takusinnaasaanni eqqumiitsuliorneq taamaassinnaasarpoq – nunarsuaq allamut saatilaarlugu, misigissutsinik pilersitsilluni, suliartornitsinni, atuarfimmi, qimmimik aneerussinermi, ikinngutit ilagitillugit, sungiusimasatsinni illoqarfikkoornermi tupigusuuteqartilaarluta.

2020mi Kalaallit Nunaannit avataanillu eqqumiitsuliortunik sumiiffimmut aaliangersimasumut erfalasunik eqqumiitsulianik pilersitsisussanik qaaqqusivugut – tasssa Holmip Illuanut, Aqqaluup Aneerasaartarfiani Nuup qeqqaniittumut pilersitsisussanik qaaqqusisimalluta. Erfalasoq siulleq qallunaamit eqqumiitsuliortumit Jacob Borgesimit suliarineqarpoq.

Borgesip oqaluttuaraa erfalasup amuneqarnerani pissutsinut assigiinngitsorpassuarnut attuumassuteqarnera. Erfalasumik amusineq uteqattaarinerinnaannginnera. Inuuissiortoqaraangat ileqquusoq, erfalasulerfinni ullorsiorfinnilu ileqquusoq, aammali sumiiffimmik nalunaarsuutitut atorneqartartoq, nunasiartaarnerni, pissaaneqarniuunnernilu ersersitsinerni atorneqartartoq.

”Aamma oqartoqartarpoq oqaluttuarisaaneq uteqattaartoq, kisianni tamanna toqqissisimanermik tunisisariaqanngilaq. Ingammik qanga pisunit kukkussutit ilinniarfigisimasorisagut takkuteqqittut malugileraanni. Erfalasumik amusineq ajornaatsuinnaanngilaq, isumarpassuarnimmi ulikkaarami. Ingammik qallunaajulluni, (inuttut) nammineq erfalasorisaq Kalaallit Nunaanni amussallugu imaannaanngilaq, pissutsinummi assigiinngitsorpassuarnut attuumassuteqarmat. Misigisimavunga iliuuserineqartareersimasumik iliuuseqalerlunga. Iliuuseq uteqqittariaqanngissorinartoq.”

Borgesip eqqumiitsuliatut erfalasuliaa sumiiffimmik nalunaarsuutitut ersersitsisuunngilaq, tamannarpiarli pillugu eqqarsaatersuutaavoq. Tassa qallunaat Kalaallit Nunaannukariarlutik erfalasulersimanerat pillugu eqqarsaatersuutaavoq. Kalaallit Nunaanni inuiaqatigiinni, aammalumi Kalaallit Nunaata Danmarkillu akornannni pissutsini aaqqissugaanerit pissaaneqarniunnerillu nunasiartaarnerup nunasiaataalernerullu pilersissimasai, ullumikkullu suli pilersittagai, pillugit eqqarsaatersuutaavoq.

ERFALASOQ//FLAG Nuummi Najukkami Ataatsimiititaliamit tapersersorneqarpoq.


ATUARTITSISSUTIT

ERFALASOQ_repeated actions_majjuni2020