Nuummi Eqqumiitsulianik Saqqummersitsivik pillugu

Katersugaasivimmi qalipakkat, akvarelit, titartakkat, ilusilersukkallu 250-t missaat saqqummersinneqarput, aammalu ukkusissanik, saanernik, qisunnik kigutinillu suliat 100-t saqqummersinneqarlutik. Katersugaasivik 600m2 missaannik annertussuseqarpoq. Ilaatigut angisuumik ilassutitaqarpoq, taarseraattunik assigiinngissitaartunik saqqummersitsiviusartumik. Katersungaatit qanganisaanerusut ilaatigut tassaapput Christine Deichmann (1869-1945), J.E.C. Rasmussen (1841-1893), Harald Moltke (1871-1960), aammalu Emanuel A. Petersenip (1894-1948) suliai. Katersungaatit nutaajunerusut ilaat tassaapput Simon Kristoffersen (1933-1990), Miki Jakobsen (in. 1965-), Buuti Pedersen (in. 1955), Hans Lynge (1906-1988), Anne-Birthe Hove (1951-2012), aammalu Pia Arkep (1958-2007) suliai. Eqqumiitsuliortut silataaneersut aammalu eqqumiitsuliortut kalaallit, Kalaallit Nunaannik isiginninneri tunngavigalugit katersungaatit inissititerneqarsimapput. Taama inissititerneqarsimaneri ileqqut malillugit takutitsisarnerit, takutitsisarnerillu nutaanerusut sunniiveqatigiinnerat maluginiarneqarsinnaalerpoq.

Nuummi Eqqumiitsulianik Saqqummersitsivik pigineqartullu annerpaartaat Svend Jungemit aamma Helene Junge Pedersenimit tunissutaapput. Saqqummersitsivik 2005-imi atoqqaartinneqarpoq. Adventisiortut Oqaluffiaasimasumi, Nuup qeqqanit minutsialuit pisukkaanni tikinneqarsinnaasumi Kissarneqqortuunnguaq 5-imi  inissisimavoq. Kommuneqarfik Sermersuumut (taamani Nuuk Kommuniusumut) tunnissutaasimavoq, ullumikkullu komuunimit ingerlanneqarluni. Tunissutip allagartaa uani qaallunaatut atuarneqarsinnaavoq.

Ukiuni kingullerni saqqummersitsivik assigiinngitsunik aallutaqartarsimavoq, soorlu illoqarfimmi eqqumiitsuliat pillugit quppersakkamik saqqummersitsisimalluni, aamma katersungaatini tusarnaarutit atorlugit takornariartoqarsinnaalernikuuvoq. Taakku saniatigut atuartitsissutinik arlalinnik pilersitsisimavoq, nukarlernut, akullernut, angajullernut GU-tunullu tulluarsarneqarsimasunik.
Ulluni pingaarutilinni, soorlu unnuk kultuurisiorfimmi, nunani tamalaani katersugaasiviit ulluanni, saqqummersitsinerni ammaanersiornerni, inuiattullu ullorsiornermi saqqummersitsivik assigiinngitsunik sammisassaqartitsisarpoq, kikkunnut tamanut ammasunik.