Februaarip 19-iani Helene Junge toqukkut qimaguppoq. Uini Svend Junge (1930-2007) peqatigalugu Nuummi Eqqumiitsulianik Saqqummersitsivik (Nuuk Kunstmuseum) pilersippaat, 2007-imilu illoqarfimmut innuttaasunullu tunissutigalugu.

Naak Svend Junge Nuummi Eqqumiitsulianik Saqqummersitsivimmi eqqumiitsulianut ataneqartinneqarajukkaluartoq ullumikkut Nuummi Eqqumiitsulianik Saqqummersitsivimmi eqqumiitsulianik katersanut Helene Junge sunniuteqanngitsoorsimanngilaq. Arlalinnik oqaluttuaqarpoq Helene Junge tassaagajussimasoq eqqumiitsulianik akitsorterussinerni pisiniartutut allagartamik tigummisartoq, arlaannillu pilerigisaqaraagami pisarsimallugit.

Naak 2005-imiilli eqqumiitsulianik katersat ilaartorneqarsimagaluartut allatullu nivinngarneqartaraluartut katersaat katersugaasiviup suli tunngavigai aallaavigalugillu, taamaammat Nuummi Eqqumiitsulianik Saqqummersitsivimmut iserluni tikilluaqqusivimmi Helene Jungep assinganik Christian “Nuunu” Rosingip qalipagaa nivingavoq, Svend Jungemik qalipakkap eqqaani.

Aappariit eqqumiitsuliat qanganisaanerit, soorlu Emanuel A. Petersenip, J.E.C. Rasmussenip, Andreas Riis Carstensenip allallu, amerlanertigut qallunaat, qalipagaannik nuannarisaqartorujussuusimapput. Eqqumiitsuliortut 1800-kkut affaani kingullermit 1900-kkut aallartinnerannut Kalaallit Nunaannukarlutik angalasarnerpassuarminnit qalipaasarsimasut; Kalaallit Nunaat assilillugu pinngortitamik isumassarsiortarsimasut, aamma kalaallit pilerfittut isigineqarnerannik isumassarsiortarsimasut. Saqqummersitaq ”Umiarsuit//Skibene”, 2017-ip ukiaani ammarneqartoq Svend Jungep umiarsuarnik qalipakkanik nuannarisaanit katersaaneersunik tunngaveqarpoq.

Aappariit SANA-mi naapissimapput – taamani sakialluttunut peqqissaavittut atorneqarpoq. Helene taamani sulilluni Svend Jungelu uninngasut tupilaliaannik pisiortorluni katersani aallartippai. Katersaasa pingaarluinnartut ilagaat saanernik, kigutinit ujaqqanillu soorlu ukkusissanit allanillu sanalukkanik katersat. Ullumikkut ini ataaseq kalaallit sanalugaannik imaqartinneqarnerusoq aaqqissuunneqarsimavoq.

Angut kinaluunniit arnamik tunuliaqutaqartarpoq; taamaalilluni Helene Junge, Svend Jungemut tunuliaqutaasimavoq, Nuummi Eqqumiitsulianik Saqqummersitsivimmilu katersanut aamma tunuliaqutaalluni.