ATLANTIKUMI

Jeannette Ehlers, Jessie Kleemann & Pia Arke

ATLANTIKUMI  Nuummi Eqqumiitsulianik Saqqummersitsivimmi saqqummersinneqartussat qulequtaraat. Tassani saqqummersitsissapput – Jeannette Ehlers, Jessie Kleemann aamma Pia Arke. Taakku immikkut Atlantiku akimorlugu eqqumiitsulioriaaseqarput – ilaatigut imminnut qitiutittarlutik allanillu ilaartuillutik.

Atlantiku oqaluttuarisaanitsinni ataqatigiissitsillunilu avissaangatitsisarpoq.  Tamannai nunasiaatillit amerlaqisut aqqutigisarsimavaat inuit inuunerannik pissaanernillu atuiffiusarsimalluni.  Atlaniku tigussaasumik tigussaanngitsumillu sumiiffiuvoq naapitsivik.  Tigussaanngitsut tassaallutik kipisanerit, attaveqaat imaluunniit angalanermi aqqut.  Atlantiku aamma tassaavoq misigisassarsiorfissaq tikitassarlu nunavissuit nunallu assigiinngitsut naapiffianni oqaluttuassartaqarlunilu qanganitsanit nipinik peqartoq.

Eqqumiitsuliortut taakku pingasuullutik timertik atorlugu sulisarput oqaluttuallu Atlantikup eqqaani tassanilu pilersimallutik.  Eqqumiitsuliortut suliaat Atlantiku akimorlugu nipit, oqaluttuat kulturillu misissuiffigalugit ataatsimoorutigaat.

 

Pia Arke (1958-2007) Eqqumiitsuliortutut Pia Arke imminut isigisarpoq uersakkatut kulturit marluk, sumiiffiit marluk nunallu akornanni akuugaasutut.  Eqqumiitsuliamini Danmarkip Kalaallilt Nunaatalu atassutaat paasisassarsiorfigisarpai nammineq imminut aallaavigalugit aammali oqaluttuarisaanermut pingaarnermut atatillugit.  Taassuma suliai arlalitsigut assinit aallaaveqartarput, nammineq timini ilanngullugu ilaatillugu suliaani arlalinni imaq ilaasarpoq killingusaatut imaluunniit sumiiffimmut allamut attaveqaatitut atortarlugu.

 Jeannette Ehlers (in. 1972) qanga Dansk Vestindien, inussianik nioqquteqarneq taakkulu kinguneri samminerullugit suliamini takutinniartarpai.  Videonik suliaani takutitsisarneranilu Afrikami europamilu kiisalu Amerikami Caribiamilu inuit tusaaneqarsimanngitsut misissorlugit paasisassarsiorfigisarpai.  Inuit Afrikamit Nunarsuarmi sumiiffinnit pingasuusut aqqutigalugit nuutinneqartut niuerutigineqartullu eqqumiitsuliortup kinaassusai ersersinniarsimavai.  Inussianik niuerneq ullutsinnut suli sunniuteqartoq.  Ehlers Arke assigalugu timini takutitsinermini atortarpaa nammineq caribiamiunik akoqarnini atorlugu oqaluttuarisaanini aallaavigisarlugu.

 Jessie Kleemann (in. 1959) aamma timini misilittakkanilu atortarpai takutitsigaangami, videonik suliaqaraangami taallioraangamilu.  Kleemannip takutitsisarnermini kulturit assigiinngissutilluunniit naapinnerat ilagunnerallu qitiutittarpai.  Eqqumiitsut matoqqasullu kiisalu isinik ammaasartut annerusumillu takutitsilersinnaasut atorlugit.  Qallunaat kalaallillu kulturikkut misigissutsikkullu tunngasortai suliarisarpai.  Arlaannaalluunniit illersunngilaa, akornanulli inissilluni puigukkat assigiinngissutillu inaannut pisarluni.  Taalliornermini kalaallisut, qallunaatut tuluttullu ajornaquteqanngilluinnartumik unigani nikerartarpoq.

Saqqummersitsineq oktobarip 28-ani nal. 17:30 ammaanersiorneqassaaq. Saqqummersitsineq Nuuk Nordisk Kulturfestivalimut ilaavoq. Januaarip 31-ata tungaanut takusarneqarsinnaassaaq.

Saqqummersitsineq Statens Kunstfondimit, Nuummi Najukkami Ataatsimiititaliamit aamma Namminersorlutik Oqartussanit Tips- og Lottomidlerne aqqutigalugit taperneqarpoq.