Ukiut tamaasa maajip 22-at Nuummi Eqqumiitsulianik Saqqummersitsivimmi nalliuttorsiutigineqartarpoq. Ullormi taanna assigiinngitsunik peqquteqarluni saqqummersitsivimmut pingaaruteqarpoq:

Nuummi Eqqumiitsulianik Saqqummersitsivik Svend Jungep 75-inik ukioqalernerani, 22. maaji 2005 ammaanersiorneqarpoq, Nuummiunullu Svend Jungemit (1930-2007) nulianillu Helene Junge Pedersenimit (1933-2018) tunissutaalluni. Tassalu tunissutip allagartaani, 15.08.2005 ullulerneqarsimasumi allaqqavoq, Svend Jungep toqunerata kingorna saqqummersitsivik Kommuneqarfik Sermersuumut (taamani Nuup Kommunea) tunniunneqassasoq. Tassunga ilanngunneqarlutik nuliariit eqqumiitsulianik katersugaat amerlaqisut, ilaatigut qalipakkat aamma ukkusissanit qiperukkat. Katersaat amerlanerpaartaat eqqumiitsuliortunit 1800-kunni 1900-kkunnilu Europamiik angalasunit suliaapput. Ingammik eqqumiitsuliortup qallunaap, Emanuel A. Petersen (1894-1948), Kalaallit Nunaata pinngortitaanik sammisaqarluni eqqumiitsuliai nuliariinnit katersorneqarsimapput. Svend Jungep aamma Helene Junge Pedersenip eqqumiitsuliat Europami akitsorterussinerni pisiarisarsimavaat.

2007-imi Svend Jungep saqqummersitsivik allisissimavaa, ukiorli taanna Svend toquvoq, ilassut suli naammassinngitsoq.

Svend Junge Jyllandip kangiata tungaani inunngorsimavoq, tassanilu sanasutut ilinniarsimalluni. Afrikami angalareerluni 1959-imi Kalaallit Nunaannut pisimavoq. 1960-imi namminersortutut suliffeqarfiuteqalersimavoq. Namminersortutut suliffeqarfiit arlallit pilersissimavai, soorlu unnuisarfiit, errorsisarfiit, assartuisartut, orsersorfiillu. Suliffiuteqarnermi saniatigut Godthåb Bådeforening-imik aallarneeqataasimavoq, aammalu Sulisitsisut-nik aallarneeqataasimalluni. Ilaatigut politikkikkut suleqataasarsimavoq; siullermik Nuummi kommunalbestyrelsemut ilaasortaasimavoq 1973-1981, kingusinnerusukkullu Akulliit Partiianik (Centerpartiet) 1991-imi aallarneeqataasimalluni.

Svend Jungemut Helene Junge Pedersenimullu ulloq 22. maaji pingaaruteqartuuvoq. Svendimmi inuuigiinnanngilaa, ullorli taanna aamma Helenelu 1965-imi katissimapput, paniallu angajulleq kuisilluni. Nuliariit suliffeqarfinnut tunngasunik aningaasaliigaangamik tunisigaangamilluunniit, sapinngisamik 22. maaji aamma eqqorniartarsimavaat.

Nuummi Eqqumiitsulianik Saqqummersitsivimmik tunniussami saniatigut Karateklubbip illussaa tunniussimavaat, aammalu Dronning Ingridip Napparsimmavissuanut CT-scannereq tunniussaralugu. Mælkebøtten-imut aamma aningaasaleeqataasimapput, Jungefonden-ilu pilersisimallugu, suli ulloq manna tikillugu ajunngitsuliornissanik suliaqartoq.

Assigiinngitsutigut Svend Jungep Kalaallit Nunaanni suliniutai pillugit Inatsisartunit nersorneqartarsimavoq. Nuummi Eqqumiitsulianik Saqqummersitsivimmik tunissuteqarneranut illoqarfimmut matuersaat nersornaatitut Svendimut tunniunneqarsimavoq. 1989-imili ataqqinaammik innuttaasunngorsmavoq, 1998-imilu Namminersornerullutik Oqartussanit sølvimik Nersornaaserneqarsimavoq, 2006-imilu aamma gultimik Nersornaaserneqarsimalluni.

22. maaji 2018 Nuummi Eqqumiitsulianik Saqqummersitsivik 13-inik ukioqalissooq, taakkunanngalu ukiut 11-t komuunimit ingerlanneqarsimavoq. Eqqumiitsulianik katersukkat nutaanerusunik qanganisaanerusunillu, kalaallinit avataaneersunillu suliarineqarsimasunik ullumikkut imaqarpoq, saqqummersitsivillu nalliuttorsiutiginnissaa peqqutissaqarluarpoq.