bannertilmailchimp

 

 

 

 

 

IKUMASUT
Arnat inuusuttut Kalaallit Nunaanni pilerfillit Nuummi Eqqumiitsulianik Saqqummersitsivimmi saqqummersitsipput
Nuummi Eqqumiitsulianik Saqqummersitivimmi Kristine Spore Kreutzmannip aamma Nanna Anike Nikolajsenip eqqumiitsuliai saqqummersinneqassapput ulloq 28/7 2016 nal. 16:30. Saqqummersitsinerup qulequtaraa ”IKUMASUT”.

Kristine Spore Kreutzmann Nuumminngaanneersoq, marriortutut ilinniarsimasuuvoq (Bornholmimi). Angalasarnermini isumassarsiortarsimavoq, soorlu Japanimut aamma Burkina Fasomut. Kristinep eqqumiitsuliaani Kalaallit Nunaata nunataa malugineqarsinnaavoq, ilusilersueriaasaanilu angalaarnermini isumassarsiffigisimasai takuneqarsinnaallutik, ingammik Japaniminngaanniik. Kreutzmannip marraq porcelæn aamma marraq Kalaallit Nunaanneersoq atorsimavai, taamaasilluni ilusilersuinermini marraat assigiinngissusaat pinnguaralugit, illuatungeriinneri malunnarsisillugit.

Nanna Anike Nikolajsen Esbjergimi inunngorpoq, inuunermili ilaani Uummannami, Tasiilami Ittoqqortoormiinilu najugaqarsimalluni. Saqqummersitsinermi uani kalaallisut qallunaatullu oqaatsit imminnut atalersinniarpai. Taamaasiornermini oqaatsit pappialani avissaartuussimavai, oqaluttuanik oqaatsit ataanniittunik takusitsilluni. Nannap aamma kalaallit sapangaataat atorpaa, sapanngap isaariai marluusut aqqutissiamik ataatsimik avitseqatigiinnerat sammillugu.
Kalaallit Nunaat silarsuarmit matoqqavallaarunnaarnikuuvoq. Tamanna Nuummi Eqqumiitsulianik Saqqummersitsivimmi augustimi malugineqarsinnaavoq, saqqummersitsinermi IKUMASUT-mi. Eqqumiitsuliortut marluk, Kalaallit Nunaanni pilerfillit, silarsuarmi angalanerminni Kalaallit Nunaanniinnerminnilu isumassarsioreernerisa kingorna eqqumiitsuliaat, nutaaliortut aamma uumassusillit takuneqarsinnaapput.

Nuummi Eqqumiitsuliornermik Saqqummersitsiviup eqqumiitsuliortut kalaallit inuusuttut, piginnaasaqarlutillu anguniagaqartut tapersersorneri tulluusimaarutigaa. Tamannalu Kreutzmannip aamma Nikolajsenip eqqumiitsuliaanik saqqummersitsinikkut ersersinneqarpoq. Uku oqariartuuteqartut nutaajusut ullutsinni inuiaqatigiit, silarsuarmillu isiginneriaatsit nutaat qanoq eqqarsaatigineqarnerinut takussutissioqataasuupput.

Ulluni 28/7 – 28/8 2016 saqqummersitsivik ”IKUMASUT” Nuummi Eqquumiitsulianik Saqqummersitsivimmi takuneqarsinnaavoq.