Nuummi Eqqumiitsulianik Saqqummersitsivimmi Julie Edel Hardenbergip saqqummersitsinera kingumut qiviarnertalik pingasunngornermi maajip 24-ani nal. 17-19 ammaanersiussaaq. Saqqummersitsinerup nunat avannarliit oqaluttuarisaanerat apeqqusersorpaa, Kalaallit Nunaannilu takussaanera attuumassuteqarneralu aamma apeqqusersorlugu. Kinaassuseq, inuiaassuseq, oqaatsit, nunasiaateqartarneq, ammip qalipaataa tunngavigalugu nikassaaneq, namminerlu oqaluttuarisaanermut oqartussaatitaaneq pillugit apeqqutit saqqummersitsinermi apeqquserneqarlutik sammineqarput.
2023-mi inatsisit tunngaviusut allanngortinneqarneri ukiut 70-inngortorsiussapput. Allanngortinneqarnerini Kalaallit Nunaat nunasiaatitut inissisimaffia atorunnaarsinneqarpoq, taamalu Kalaallit Nunaat Inuillu/kalaallillu Danmarkip naalagaaffianut ilanngutsinneqarlutik. Danmarkip nunasiaateqarnermik oqaluttuarisaanerata politikkikkut kulturikkullu Kalaallit Nunaanni sunniuteqarnera Julie Edel Hardenbergip eqqumiitsuliortutut misissugaraa aammalu ersersittarlugu.
Julie Edel Hardenberg (1971) Nuummi inunngorlunilu peroriartorpoq. Eqqumiitsuliortutut nunani Finlandimi, Norgemi, Englandimilu ilinniareerami Det Kongelige Danske Kunstakademimi ilisimatusarnermigut isumaliulersitsisartutut angusivoq (MA i Kunstteori og Formidling).
2022-mi Novo Nordisk Fonden – Mads Øvlisen ph.d. isumaliulersitsiffiusumik eqqumiitsuliornikkut ilisimatusarnissaanik aningaasaliiffigineqarpoq, qulequtaralugu: ”Pissaanerup pissaanikinnerullu akornani – tarni pituttorsimaffilik pituttorsimaffeqanngitsorlu”. Qulequtap ataani kalaallit akornanni misigisimasat eqqaamasallu tunngavigalugit nunasiaateqartarnerup sannaasa aammalu taakku atoqqinneqartarnerisa kinguneri takuneqarsinnaanngitsut misissorpai.
Københavnimi najugaqarpoq, ulluinnarnilu Det Kongelige Danske Kunstakademi aammalu Københavns Universitetimi atorfeqarpoq, saniatiguttaaq Norgemi Kunstakademiet i Bergenimi atorfeqarluni. Ukiuni 30-ni kinaassutsimut nunasiaataasimanermullu tunngasunik sammisaqarpoq.
Nuuk Nordisk Kulturfestivalimut maajip 25-anit 28-anut pisumut atatillugu ammaanersiorneq pissaaq. Saqqummersitsineq oktobarip aallaqqaataata tungaanut takusarneqarsinnaassaaq.
Saqqummersitsineq Namminersorlutik Oqartussanit Tips- og lottomidlerimit taperneqarpoq, Augustinusfondenimit aamma Statens Kunstfondimittaaq taperneqarluni.