Atuarfinnut, meeqqanik paaqqinnittarfinnut, assigisaannullu Nuummi Eqqumiitsulianik Saqqummersitsivik akeqanngilaq – ammarsarfiillu saniatigut pulaarneqarnissarput aamma ammaffigalugu.

Nuummi Eqqumiitsulianik Saqqummersitsivimmi ataavartumik workshoppit atuartitsissutillu suliarineqartarput. Workshoppit atuartitsissutillu katersaanut immikkullu saqqummersitsinernut tunngasarput, meeqqat atuarfiinut ilinniarfinnullu assigiinngitsunut tulluarsagaasarlutik. Kalaallit Nunaanni eqqumiitsuliorneq aamma Kalaallit Nunaata eqqumiitsuliornermi oqaluttuarisaanera ukkataraarput, atuartup eqqumiitsuliallu akornanni naapiffik pingaarnerutillugu.

Workshoppernerni atuartitsinernilu atuartut suliaqartarput, eqqumiitsuliallu sammisarlugit. Maluginiutit, misigissutsit, tunngavilersuinerit oqaasilersuinerillu tunngavigalugit eqqumiitsuliat sammisarpaat.

Nittartakkami uani aamma Kommuneqarfik Sermersuup nittartagaani Kulturikkut isumassarsiorfimmi Nuumi Eqqumiitsulianik Saqqummersitsiviup neqeroorutai atuartitsissutillu takuneqarsinnaapput.

Workshoppernissamik inniminniissaguit ugguuna allagit kunstmuseum@sermersooq.gl

Apeqqutissaqaruit imaluunniit aaliangersimasumik saqqummersitsivimmi atuartitsinermik ingerlataqarusukkuit ugguuna allagit kunstmuseum@sermersooq.gl imaluunniit uunga sianerit 36 60 33.

 


KATERSUGAASIVIK – SUNAAGAMI? // 1.-3. klasse

Katersugaasivik sunaava? Illu qanoq misigisassarsiorfigineqarsinnaava? Illup isikkua, initai inissisimaffialu pillugu oqaluttuassartaqarpa? Maluginiutit atorlugit inimi misigisassarsiortoqarsinnaava? Katersugaatit suuppat – illillu suut katersugaatigaagit?

Nuummi Eqqumiitsulianik Saqqummersitsivimmi imaluunniit Nuutoqqami (Nuuk Lokalmuseum) paasisassarsiorit. Illuliortaatsip oqaluttuassartaa katersugaasivillu suunersut paasisaqarfigikkit.

Maluginiutitik suliassiissutigineqartullu atorlugit atuartut katersugaasivinni suliaqassapput, katersugaasiviit illutaannik illulioriaatsit, oqaluttuassartaat kiisalu eqqumiitsulianik saqqummersitsiviit Nuummilu katersugaasiviit suuneri sammissavaat.

 

QUIASUNNARTUT ULORIANARTULLU // 1.-3. klasse

Kiinappaat tupilaallu sammissavagut. Qanga tupilak suusimanersoq pillugu atuartut oqaluttuunneqassapput, kiinappaallu qanoq atorneqarsimanersut oqaluttuunneqarlutik. Tupilaat qiperukkat kiinappaallu saqqummersitsivimmiittut qimerluussavagut, isikkuilu quiasunnarlutilllu ulorianarpasittut sammillugit. Atuartut titartaallutik ilusilersuillutillu quiasunnartortai ulorianarpasittortaalu sammissavaat.

 

EQQUMIITSULIAT NIPILERLUGIT // 4.-10. klasse

Eqqumiitsuliaq qanoq nipeqarpa, inillu ataasiakkaat iluanni nipi atorlugu qanoq misigisassaliorsinnaavugut? Workshoppi nipip suuneranut, qanorlu eqqumiitsulianik sammisaqarnermi atorneqarsinnaanera misigisaqartitsisinnaaneranullu tunngasuuvoq. Siullermik atuartut Nuummi Eqqumiitsulianik Saqqummersitsiviup nipinik misigisassaliaa tusarnaagassiaq tusarnaassavaat, ininut isersimaffigisanut naleqqussagaq. Taamaaleriarlutik eqimattakkaarlutik namminneq eqqumiitsuliat nipilersussavaat, tusarnaagassiamillu sanallutik.

Atuartut eqqumiitsulianit misigisatik eqqarsaatitillu nipi tunngavigalugu ersersinnissaat siunertaavoq, taamaalillutillu aamma nipip qanoq atorneqarsinnaaneranik ilikkagaqaqqullugit. Ullut ingerlanerani nipinik assigiinngitsunik tusaasaqartuartarpugut, amerlanerilli malugineq ajorpagut. Nipilli sunnertarpaatigut, misigisaqartittarlutalu. Workshoppimi eqqumiitsuliornermi nipi, nipit qanoq pinngortarneri, nipillu qanoq ittuuneri sammineqassapput.
 

EQQUMIITSULIORNEQ – MISISSUEQQISSAARNEQ // 7.-10. klasse

Eqqumiitsulianik misissueqqissaarnermi atuartunut angajullernut Nuummi Eqqumiitsulianik Saqqummersitsivimmi workshoppertitsineq. Eqqumiitsulianik misissueqqissaarinermut tunngasut suliassat assigiinngitsut eqqumiitsuliat tunngavigalugit atuartut suliaqassapput. Suliassat eqimattakkaarluni ataasiakkaarluniluunniit suliarineqartussatut aaqqissuunneqarsinnaapput.

Atuartut eqqumiitsuliorneq qanimut misigalugu misissueqqissaarnermut tunngasunik ilisimasaqalernissaat siunertaavoq. Tassunga atatillugu eqqumiitsuliaq qanoq misissoqqissaarneqarsinnaanersoq isummersorfigineqarsinnaanersorlu ilisimalernissaat aamma siunertaavoq. Atuartut misigisaat isummersornerminnillu tunngavilersuisinnaanerat qitiutinneqarpoq. Kalaallit Nunaanni eqqumiitsuliornermut tunngasunik aallarniutitut atuartitsissutaavortaaq.

7.-10. klasse – Assinik misissueqqissaarneq