Nuummi Eqqumiitsulianik Saqqummersitsiviup katersugaatai nalunaarsorneqassapput. Taamaattumik Saqqummersitsivik matoqqassaaq 13. novembarimit 14. decembarimut.

Sukumiisumik nalunaarsuisoqassaaq, eqqumiitsuliat tamarmik allattorneqassapput taaguutaat, eqqumiitsuliortoq, uuttuutai allaaserineqarneralu databasemut immiullugit. Aallaqqaammut Nuummi Eqqumiitsulianik Saqqummersitsivimmi takuneqarsinnaassaaq, pilersaarutaavorli 2018-mi kikkulluunniit eqqumiitsuliat assingi takusinnaalissagaat atuarsinnaallugillu. Imaappoq, atuarfiit/ilinniarfiit allat, inuit sulianut tunngassutillit soqutiginnittullu Nuummi Eqqumiitsulianik Saqqummersitsiviup katersugaatai ujarlerfigisinnaagaat.

Eqqumiitsuliat katersugaatit taamaasilluni illersorneqassapput, aammalu ilisimatusartunit ilinniagaqartunillu takuneqarsinnaanngussapput.

Nalunaarsuineq taamaasilluni katersugaasiviit aaqqissugaanerannut, katersugaasiveqarnermut inatsimmut naapertuuttumik sakkussaalluarpoq pingaarutilik.

Nalunaarsuinerup aamma imarivaa Nuummi Eqqumiitsulianik Saqqummersitsiviup katersugaatit pigisai pillugit paasissutissat ilisimasassallu katersussallugit – taamaasilluni Nuummi Eqqumiitsulianik Saqqummersitsiviup ulluinnarni eqqumiitsuliat pillugit paasissutissanik ingerlatitseqqiisinnaanera ajornannginnerullunilu patajaallisarneqassaaq. Eqqumiitsuliaq kimit suliaanersoq paasissallugu ajornanngitsuussaaq aammalu eqqumiitsuliortoq taanna allanik eqqumiitsulianik katersugaatiniittunik suliaqarsimanersoq nassaariuminartuussaaq.

Nalunaarsuineq ingerlaavartumik suliassaavoq. Eqqumiitsuliat nutaat katersugaatinut ilannguttut databasemut nalunaarsorneqartassapput, paasissutissallu pisoqalisarput iluarsineqarlutilluunniit nutarterneqarlutik.

Suliat 1000-init amerlanerit nalunaarsussallugit piffissamik atuiffiusariaqarput taamaattumik piffissami tassani saqqummersitsivik ikiorteqartussaavoq Gry Fors-imit, taanna ulluinnarni saamit eqqumiitsulianik katersugaataat pillugit aqutsisuuvoq immikkullu pigisanik assiliisartutut ilinniarsimasuulluni.

Nuummi Eqqumiitsulianik Saqqummersitsiviup Facebookiani malinnaagit – tassani malinnaavigineqarsinnaavoq eqqumiitsuliat oqaluttuassartaat angisuut mikisullu nalunaarsorneranni killiffiit.