Saqqummersitsineq Uumasut akornanni februaarip 16-ani Nuummi Eqqumiitsulianik saqqummersitsivimmi ammassaaq, tassaassalluni Lisa Kreutzmannip siullermeerluni Nuummi kisimiilluni saqqummersitsinera.
Kreutzmannip akrylimik qalipagai oqitsutut uummaarissutullu ilisimaneqarput, kisianni allaanerulluinnartunik sunik tamanik ersarissaaffillit oqaluttuassartallillu. Paasiuminaassinnaasarput quinarsinnaasumillu isikkoqarsinnaasarlutik, amerlasuutigulli ilumoorsaartumik eqqarsarnartortaqartumillu suliaasarlutik. Kreutzmannip najukkaminieersut nunarsuarmi pisunut akulerullugit atukkajuttarpai. Ilaatigut timmiaq tuullik Tyrannosaurus rex-imut akuliutitiinnarlugu. T-rex Kreutzmannip nammineq oqarneratut taasarpaa kammannguara. Najukkameersut nunalu tamakkerlugu isumassarsiat, aammalu silarsuarmut soqutiginninneq najukkaminullu minguitsumik unneqqarissumillu attaveqarnera Kreutzmannip eqqumiitsuliaani takussaapput.
Kreutzmannip nunaqqataasa ilai arnat nukittuut eqqumiitsuliaani ilaapputtaaq; Batmanitut kiinarpallit, aamma Canadami nunap inoqqaavisa arnartai piginnaatitaaffitik pillugit ilungersuuteqartut ilaatittarlugit. Eqqumiitsuliaani ilisimasaqarusussuseq aammalu najukkamiittunik silarsuarmillu annertuumik alapernaatsuuneq malugineqarsinnaapput.
Lisa nammineerluni atuakkami Kimik Ukiut 20 år, oqaluttuarpoq:
”Asimi sissami uumasuni, oqaluttuatoqqani assitoqqani, allarpassuarnilu isumassarsiortarpunga. Oqaluttuatoqqat soqutigisaraakka, tassa inuit uumasullu pissusilersorneri ilusaallu. Titartaariaaseq qalipaariaaseq qanganisarpalaartoq artorlugu nuannaraara. Ukiuni kingullerni eqqumiitsulioriaaseq qangarnisarpalaartoq nutaaliaanerusorlu akuleriisillugit sammisarilernikuuakka.”
Nangilluni oqarpoq:
”Titarnerit tamarmik isumaqarput. Uannut nuannaarutaavoq tupinnartoq, uummatima kassunneranik sukkanerulersitsisartoq. Assilialioraangama qamuuna uannut attuinissaat pingaartittarpara allanullu nuannaarutaanissaa kissaatigisarlugu. Eqqumiitsuliat allat suliaat uannut nuannaarutaasumik tunisisarmata uanga aamma tamanna allanut ingerlateqqikkusuttarpara.”
Lisa Kreutzmann pillugu: Lisa Kreutzmann 1981-imi Kangaatsiami inunngorpoq tassanilu suli najugaqarluni. 2000-imi 2005-imilu Eqqumiitsuliornermik Ilinniarfimmi ilinniartuuvoq, kingornalu Danmarkimi kunsthøjskolemi aammalu The Drawing Academy-mut The Animation Workshop-imiittumi 2009-mi peqataaffigalugu. Maanna ukiuni 15-inngulersuni kalaallit eqqumiitsuliortut peqatigiiffiat KIMIK ilaasortaaffigivaa. Eqqumiitsuliai peqatigiiffiup saqqummersitsisarneri aqqutigalugit ilisimaneqartuupput, aammali allakkanut meqqiliaanit illunillu pinnersagaanit ilisimaneqarlutik – ingammik Ilulissani eqqaanilu illut pinnersarsimasai.
Lisa Kreutzmannip takorluuilluni silarsuaa inersimasunit meeqqanillu qimerluussallugu kajumigineqarluartarpoq, aammalu 2024-ip ingerlanerani amerlanerusunut eqqumiitsuliaanik ammaanissarput qilanaaraarput.
Saqqummersitsineq Aningaasaateqarfik Sermeq, KNI A/S aamma Eqqumiitsuliornermik Aningaasaateqarfik tapersiisoralugit pilersinneqarpoq, saqqummersitsinerlu maajip aqqaneq aappaat ilanngullugu takuneqarsinnaassalluni.