THE CHARACTERS – Tonje Bøe Birkeland

// KILLUT & Nuummi Eqqumiitsulianik Saqqummersitsivik
28.10. – 31.01.2022

1870-imi ilisimatusarluni angalasoq sunaava? – angutaava?… Angut ilisimatusarluni angalasoq ilisimaneqarluarpoq, Europamilu oqaluttuarisaanermi uitsaviusutut maligassiuisutullu isigineqakkajuttarluni. Angalaneri ullorsiutigisimasaannit takussutissaqarluartarput, nunanik ilisimaneqanngitsunit pissanganartunik oqaluttuarlutillu nassuiaallutik allattarsimallutik. Piffissalli tamatuma nalaani arnat naak?

 

Eqqumiitsuliani nangeqattaartuni ”The Characters”-imi Tonje Bøe Birkelandip imminut assilisarnermigut, ullorsiutinik allannermigut atortunillu assigiinngitsunik atuinermigut oqaluttarisaanerup oqaluttuarineqartullu uppernassusaat misissorpai. Arnanik arlalinnik ilisimatusarlutik angalasunik pilersitsinermigut arnat pinngortitami inissisimaffiat, aamma ilisimatusarnerup silarsuaani inissisimaffii unammillerpai. Arnat angummik sernissorteqartinnatik oqaluttuarisaanermi ilisimatusarnerup silarsuaani inissaqartinneqartarsimanngillat. Tonje Bøe Birkeland nammineq arnatut ilisimatusarluni angalasutut inuttaliuttarpoq. Inuttaa ullorsiutinit tingulaarinernik angalanernillu oqaluttuarnernik allalluni, atisanillu, assiliivinnik, nunallu assiganik pigisalersorlugu ineriartortittarpaa. Arnat oqaluttuarisaanermi inissalersorpai, piviusut pilersitallu akornanni inissisimasunik. Oqaluttuaq ammaattarpaa, inuttanillu pilersitaanut isiginnaartoq qanillisivillugu paasisaqarsimatilersarlugu, oqaluttuarisaanermilu pisunut attuumassuteqartilersarlugu. Assersuutigalugu, Character #IV (inuttassaq #IV) Anna Aurora Astrupip Kalaallit Nunaanni ilisimatusarluni angalanerminit paasisimasani saqqummersinniarlugit aalajangerpoq. Taamanili arnarpassuit maligassiuisut allat assigalugit atuakkanik naqiterisitsisarfinnit itigartinneqarpoq, saqqummersitassatullu suliaa ukiorpassuarni naammassineqaranilu puigorneqaannarsimavoq.

 

Tonje Bøe Birkeland Norgemi Bergenimi 1985-imi inunngorpoq. 2021-mi Bergenimi ilisimatusarfimmit Fakultet for Kunst, Musikk og Design-imi MFA naammassisimavaa. Suliaa ”The Characters” 2008-mi aallartissimavoq, inuttaliallu tallimanngorsimallutik. Suliani aqqutigalugu 2012-imi Hasselblad Foundationimit The Victor Fellowship-imik tunineqarsimavoq, atuakkiaalu Character #V “The Bhutan Trilogy” 2016-imeersoq Norgemi ilusilersuilluni unammisitsinermi “Årets Vakreste Bøker 2017” (ukiumi matumani atuakkat kusanarnersaat) ajugaasup tulliatut toqqagaasimalluni.

 

Saqqummersitsineq Nuuk Nordisk Kulturfestival 2021-mut atavoq, neriniartarfimmullu Killut-nut aamma Nuummi Eqqumiitsulianik Saqqummersivitsivimmut avinneqarsimalluni saqqummersinneqarluni.