Ilisarsinerit

Nuummi Eqqumiitsulianik Saqqummersitsiviup katersugaataasa ilarpassui angerlarsimaffinni nivingatinneqarsimasuupput. Qalipakkat ilaat pisiaapput nalaasaarfiup qulaani nivingasussanngorlugit, imaluunniit nerriviup qulaanut allamilu inissiffissami tulluuttumi. Svend aamma Helene Junge 2005-imi eqqumiitsulianik katersaaterpassuatik Nuummi innuttaasunut tunissutigaat – taamanikkorniillu Nuummi Eqqumiitsulianik Saqqummersitsivimmiilerlutik.

Nuummiutoqqat pingasut – Abia, Amalie aamma Marianne – qinnuigisimavagut tamarmik immikkut saqqummersitsivimmiittunik tallimanik toqqaaqqullugit. Taakku toqqaaniarnerminni eqqaanartitaminnik ilisarisaminnilluunniit toqqaasimapput. Kingorna angerlarsimaffiinut pulaarsimavagut, tassanilu eqqumiitsulianik pigisaminnik oqaluttuuppaatigut. Eqqumiitsuliat pineqartut saqqummersitsinermi ‘Ilisarsinerit’ qimerloorneqarsinnaassapput.

Toqqartuisuusut Abia, Amalie aamma Marianne tamarmik immikkut eqqumiitsuliaq pigisartik oqaluttuaralugu immiunneqarsimapput podcastinngorlugu, isaarissami atorneqarsinnaasumik. Saqqummersitsineq pillugu quppersagaaqqami eqqumiitsulianik toqqakkaminnik ilisarsinerat atuarsinnaassavat.

Illit nammineerlutit aamma eqqumiitsuliat sorliit ilinni ilisarsinermik pilersitsinersut isumaliutigisinnaavat…