Cape Dorset West Baffin Islandimi Nunavumi inissisimavoq, 1300-innarnik inoqarluni. Taamaakkaluartoq Canadami eqqumiitsuliortartunit naammassisaqarluartartunit ukiut 50-it sinnerlugit suliaqarfiusarsimavoq. Eqqumiitsuliortut sulliviat Kinngait Cape Dorsetimi inissisimvaoq. Kinngait tassaavoq Inuit Cape Dorsetimut taajuutaat. Eqqumiitsuliat saqqummersitsinermi uani takuneqarsinnaasut Kinngait-imi suliaapput.

Issittumi uumasut, pinngortitaq, atisat – taakkuupput eqqumiitsuliani sammineqartartut, eqqumiitsuliat Cape Dorsetimeersut ilisarnaatigisartagaat. Assiliartaliortaaserli tunngavigalugu naammassineqarsimasarlutik; erseqqissumik  ilusilerneqarsimallutik, isummersorfigineqarsimallutik, imaluunniit allanngorsarneqarsimallutik. Sammineqartut ilisarnartuusarput, qalipaaserneqarsimanerilu naqiterneqarnissamut tulluarsagaasimasarlutik. Sammineqartut naqiterneqarnissamut tulluarsarneqarsimaneri, eqqarsaatersuuteqalersitsisunik allanngortiterneqarsimasarput, imaluunniit alianaallisitsisunik erseqqissarneqarsimallutik.

Naqitanik eqqumiitsuliorneq James Houstonimit isumassarsiarineqarpoq. James Houston eqqumiitsuliortuusimavoq Canadamilu naalakkersuisunit Northern Service Officeriulluni. James Houston angutit Inuit peqatigalugit naqitanik eqqumiitsuliornermik 1957-imi misileraasalerpoq. Japanimiinnermini qisummut kigartukkat naqitanik eqqumiitsuliornermut aamma isumassarsivigisimavai, tamatumani eqqumiitsuliortup titartagaa naqiterisumut tunniunneqartarsimammat. Eqqumiitsulioriaaseq taanna Cape Dorsetimut nassarsimavaa, qisulli atornagu, nunap pissarititaa naammineq pigisartik atorsimavaa – ujarak. Ujaqqanik kigartuisalersimapput, eqqumiitsulioriaaserlu stonecut-imik taaneqartalerluni. Tamatuma kingorna naqitereriaatsit assigiinngitsut pilersinneqarsimapput – stencilit, kigartuilluni assilialiorneq (radering), lithografi il.il.

Eqqumiitsuliat Cape Dorsetimi suliat tamarmik eqqumiitsuliortunit marlunnit suliaapput. Eqqumiitsuliortoq ataaseq naqiterinikkut assilisassamik titartaasuusarpoq. Titartakkat sorliit naqiterinikkut assilisassatut piukkunnarnerpaanersut sullivimmi sulisunit aaliangerneqartarpoq. Naqitereriaaseq titartaktakkamut naleqqunnerpaaq atorlugu eqqumiitsuliortup aappaa naqiterisuusarpoq.

Houston isumaqarsimavoq titartakkanik naqiteraluni eqqumiitsuliorneq Inuit saarnernik, ujaqqanik kigutinillu qiperuisarnerannut arlaatigut toqqaannartumik attuumassuteqartoq. Taamaalillutik eqqumiitsuliat pitsaassusaat qaffassarneqarsinnaallutik, Cape Dorsetip avataanut tunineqarsinnaallutik;  takornarianuinnaanngitsoq tammajuitsussatuinnaanngitsorlu, nunarsuarmili eqqumiitsuliortut suliaannik saqqummersitsiviusartunut tunineqarsinnaallutik.

Eqqumiitsuliornermik Ilinniarfik Nuummiittoq 1975-imi isuma taanna tunngavigalugu aamma pilersinneqarsimavoq, taamani Grafisk Værksted-imik taaneqarluni. Cape Dorset maligassiuisoralugu eqqumiitsuliornermik ilinniarfimmi naqiterilluni eqqumiitsuliorneq qitiutinneqarsimavoq.

Naqitanik eqqumiitsuliorfik maanna Sullivik Kinngait-mik ateqartoq 1959-imi pilersinneqarpoq. Sulliviup Kinngait-p 1959-imi pilersinneqarneraniilli eqqumiitsulianik naqitanik katersanik ukiut tamaasa saqqummersitsisoqartarpoq, sullivillu 1979-imi nittarsaassinermut immikkoortortaqalermat Cape Dorsetip avataani saqqummersitsisalerpoq.

Tamatuma kingorna Ilulissani eqqumiitsulianik katersugaasivimmi saqqummersinneqassooq, ulluni 01.06-31.08.18.