Eqqumiitsuliatut erfalasuliat tulliat sisamanngornermi juunip 27-ani amuneqassaaq.

Eqqumiitsuliani erfalasuni pingajussaat eqqumiitsuliortumit Gudrun Haslemit suliaavoq. Eqqumiitsuliaq erfalasoq marlunnik isilerneqarsimavoq, illuatalu tungaani allanneqarsimalluni ”Jeg vil garne være usynlig”. Gudrun Hasle eqqumiitsulioraangami nammineq misigisimasaminit tunngavilersuikkajuttarpoq; timimut tunngasut, misigissutsinut aammalu eqqarsaatinut tunngasut. Gudrun ordblindiuvoq, eqqumiitsulioraangamilu ordblindiunini arlaatigut sammisarlugu – allakkaangami naqinnerit kukkusarneri kisiisa samminagit, aammali ordblindiunermi misigissutsit, tarnikkullu kingunerisinnaasai, soorlu ilaatitaanngittarneq sammisarpai. Ordblindiunermillu paasitinneqarnermi inissinnerliortutut, inuttullu eqqunngitsutut misiginermut tunngasut aamma sammisarlugit. Eqqumiitsuliaani inuttut qajannassuseq ersersinneqarsimakkajuttarpoq.

Gudrunip eqqumiitsuliatut erfalasuliaa juunip 27-ani amuneqartussaq nammineq misigisimasaanit, aammali inuiaqatigiinni malugisimasaanit tunngaveqarpoq. ”Jeg vil garne være usynlig” qallunaajulluni Kalaallit Nunaannut tikinnermut tunngavoq, tikinnermi nipituutut ersarissutullu misigisimanermut tunngalluni. Qallunaajulluni nunasiaateqarsimanermut tunngasunik pigisaqarnermik avaqqussisinnaannginnermut tunngavoq. Gudrunip qungujulaarluni taasarpaa ”besætterbagage” (tiguaasuusimasutut nassataqarneq), aammalu nassatap taassuma peqqutaalluni qallunaajussusermik nungusartitserusussuseqalersitsinera eqqumiitsuliamini sammillugu.

Aappaatigut eqqumiitsuliaq erfalasoq aamma inuiaqatigiit pillugit eqqarsaatersuutaavoq. Imminut toquttarneq kingunerisartagaalu inuiaqatigiinni qanoq initutiginera eqqarsaatersuutigineqarpoq, erfalasorlu aqqutigalugu Gudrun aperivoq imminut toqunneq takuneqarnissamik imaluunniit inuttut malunnarunnaarnissamut tunnganersoq. Imminut toqunnermut misigissutsit tamaasa pillugit apeqqut. Imminut toqunneq qamanngaanniit ikioqqunermut tunngava, imaluunniit ersikkunnaarusunnermut tunngava?
Oqaloqateqarnissat pisariaqartikkukku Tusaannga attavigiuk tlf. 801180, SMS 1899.

Erfalasut eqqumiitsuliaapput, Holmip Illuani amuneqarsimareerunik ataatsimut saqqummersitsinermi takutinneqartussat.
Eqqumiitsuliaq erfalasoq ulluinnarni ullaat tamaasa amuneqartarpoq, ualikkullu aqqarneqartarluni.

Aningaasaliisut qujaffigaagut:
Statens Kunstfond

ATUARTITSISSUTIT // SULIASSAT

UV FLAG Gudrun Hasle DK

UV ERFALASOQ Gudrun Hasle KAL