ERFALASOQ // Hesselholdt & Mejlvang

Eqqumiitsuliornikkut ingerlanneqartumi ERFALASOQ // FLAG-imi erfalasup tullia eqqumiitsulioqatigiittartut Hesselholdt & Mejlvang-ikkut suliarisimavaat.

Erfalasoq atsersimavaat “Flag of interests“. Oqaatsip interests marloqiimmik isumaqarnera sammisimavaat, tassa soqutigisanik isumaata saniatigut aamma aningaasatigut ernianik isumaqarsinnaammat. Erfalasoq nunat allat issittoqarfimmi soqutigisaqartut erfalasuannit ilutsinik pinnguarneruvoq. Erfalasoq ilutsinik sumiiffiillu tunngavigalugit politikkilerinermik sammisaqartuuvoq.

“Nigalik marlunngorlugu avinneqarsimasoq arsatut ippoq, ilutsini assigiinngitsuni arsaatigineqartutullusooq illuni – soorlu pissaaneqarniulluni arsaannermi. Pilersaarusiornerni qaffasissuni nunavissuarmi pingaartinneqaleraluttuinnartumi arsaanneq. Eqqumiitsuliaq nunat erfalasuisa sequmisinneqarnerinik ilisarsisitsisutut ippoq, qeqqanni qaartoqartutut illuni, suujunnaarsitsisoq isaterisorlu, ammallorissunik sumiiffinnut nutaanut ingerlasitsilluni” Flag of interests pillugu Hesselholdt & Mejlvang taama oqarput.

Hesselholdt & Mejlvangip eqqumiitsuliaanni kalaallit erfalasuani ilisarnaatit qalipaataalu nunani allani, tassa USA-mi, Ruslandimi, Norgemi, Canadami, Kinami, Danmarkimi allanilu, erfalasut ilusilersorneqarnerannut akulerutsinneqarput. Nunat taakku tamarmik issittoqarfimmi aningaasaqarniarnermik sumiiffiillu tunngavigalugit politikkeqarnermik soqutigisaqartuuput.

Eqqumiitsuliortut qallunaat marluk Sofie Hesselholdt aamma Vibeke Mejlvang 1999-imili eqqumiitsulioqatigiittalersimapput. Eqqumiitsuliaat amerlanertigut sumiiffinnut aaliangersimasunut tunngasarput, namminnerlu suliatik isumasiugassatut nalorsitsaarutitulluunniit aaliangersimasunik akissutissaqanngitsutut nassuiartarpaat. Eqqumiitsuliaat ilisarnartunik atuikkajupput, katiterneqarnerisigut eqqaasitsisinnaasunngorlugit allanillu isiginneriaatsinik ersersitsisarlutik.

Sisamanngornermi aggustip 27-ani nal. 16 Holmip Illuata naatsiivittaani erfalasoq eqqumiitsuliaq amussavarput. Nuummi Eqqumiitsulianik Saqqummersitsivik aamma Gudrun Hasle eqqumiitsuliaq pillugu oqaaseqassapput. Kaffi, tii kaagilu sassaalliutaassapput. Peqataaneq akeqanngilaq, kikkullu tamarmik tikilluaqusaallutik.