Ivínguak’ Stork Høegh (i. 1982)
Nuuk Nordisk Kulturfestival 2023-mi Nuummi Eqqumiitsulianik Saqqummersitsivik eqqumiitsuliortut saqqummiineranni Reflecting Nuuk Nordic-imi Nunat Avannarliit Piorsarsimassutsikkut nunatsinni Attaveqaataa (NAPA) aamma saamit eqqumiitsuliortoqatigiit Dáiddadállu suleqatigalugit aaqqissuussimavaat. Saqqummiinerni nunasiaataasimaneq, issittumi nunanilu avannarlerni inuuniarnikkut atukkat, eqqumiitsuliortunut periarfissarititat allarpassuillu sammineqarpoq. Eqqumiitsuliortoq Ivínguak’ Stork Høegh assilissanik katiterilluni ataqatigiissaartuliaminut ArcticExotic-imut atasumik oqallittarfimmi assitut atorneqartussamik pilersitsivoq. ArcticExotic-imi assilialiamini issittumi inuunermit ilisarnartut Afrikami narsaannarsuarmeersunik uumasortalersortarpai, assilialiaalu takunnittunut Kalaallit Nunaannik isiginneriaatsinut unammillertut. Suliat ArcticExotic-imeersut uanilu saqqummiussaa tamarmik assilisanik – toqqortanit imaluunniit nammineq assilisaanit pisuupput – qarasaasiakkut qaleriiaarsimavai, naggataagut qalipaasersorlugillu titartagartalersorsimasarlugit.* Uani assilisami naggueqatigiinnit Inunneersup arnap uluminik atuisup assinga atorneqarpoq, kisianni Stork Høegh-ip Afrikap nagguaatsuanut ingitissimavaa. Nagguaatsoq Issittup nunataata avataani assilisaanera qularisassaanngilaq. Nagguaatsoq zebratut titarnilersorneqarsimavoq, Stork Høegh-imit titartarneqarsimasunik naasunik lupininik tungujortunik avatangiiseqarluni. Suliap qulaatungaa issittup imartaanik sikuiartumik assitaqarpoq, seqerngullu qinnguaasa assilialiaq qorsorpaluttutut isikkoqalersissimavaa.
Asseq arlalitsigut upperiuminaatsortaqarpoq. Kalaaleq arnaq Afrikamilu nagguaatsoq piviusumik naapinngisaannarsimapput. Aamma arnap assilineqarnermi nalaani nagguaatsoqartorluunniit ilisimassagaa ilimanarpallaanngilaq. Taamaakkaluartoq qaavani issiavoq, peqinganermigullu uluni atorlugu nagguaatsoq pilallugu aallartissimarpasippaa. Nagguaatsup zebratut allaqarnera takullugu asseq suli upperiuminaannerulerpoq. Nagguaatsormi arnamut uumasorujuttut oqaluttualianiinnaq nassaassaasutut innera takorloorneqarsinnaavoq. Silarsuaq piviusuunngitsoq, oqaluttualiatut ittoq, qalipaatigissorlu assilialiami takuneqarsinnaavoq – takorluugaannaq. Naallu arnaq nagguaatsorlu imminnut naapissinnaasutut takorloornanngikkaluartut, nunarsuummi affaanni illuatungeriinni nunaqarmata, assigiissuseqarnerat malunnarpoq: Tassalu eksotiskiunertikX alutornaqutigigamikku. Nunanimi killerni Afrika Issittorlu tassaapput arlaanni tikissallugit takorlooruminaatsut, nalinginnaasumik inuunerminnut ungasingaarmata.* Kisianni piviusuupput piviusunik inullit – eksotiskiunertik piinnarlugu takorluugaannanngitsut. Suliami piviusoq piviusuunngitsorlu naapisinneqarnerisigut isiginnittoq unammillerneqarpoq: Nammineq eksotiskiusunik takorluuisarnera isiginerpara?
Eksotiskiusoq nunasiaataanerlu imminnut atapput. Takornartat Afrika Issittorlu nunasiaatigileramikku, namminneq sumiiffiit eksotiskiusut oqaluttuassaqalersippaat.* Nunat paasisassarsiorfigineqarput, nalunaarsoqqissaarneqarlutik ilisimasassarsiornersuartigullu misissuiffigineqarlutik, nunasiaatilinngortullu inuiaat nunaqavissut isaaffigaat. Suliami arnaq nagguaatsorlu naasunik lupininik unguneqarsimapput. Lupinit pinneraluaqalutik naasupiluupput siaruariartupiloortartut, sorlartunermikkullu tassaallutik nunap naasuiinik nungusaasut. Lupinit Europamit eqqussaasimapput, maannalu Kalaallit Nunaata naasuinik ulorianartorsiortitsisuullutik.** Nagguaatsoq Inullu aamma naasutulli ulorianartorsiortitaapput. Afrikap nagguaatsua nungutaanissamut aarlerinartorsiorpoq, arnallu ilitsoqqussamik inooriaasitoqaa atuukkunnaariartulersimalluni. Takornartat avataaneersut, nunasiaateqartarnerup aammalu eqqussat aarlerinartorsiortippaat, lupinit pissussaattoqqisssaaq. Naak Stork Høeghip suliamigut nunasiaataaneq aamma eksotiskiuneq sammisaraluarai unnerluussiniarnerunngilaq pisuutitsiniarnerunanilu.* Paarlattuanilli qanoq nunasiaateqartarnerup qanoq isigineqartarnera unammillerpaa. Isumaqarpoq nunasiaataaneq Kalaallit Nunaata oqaluttuarisaaneranut ilaasoq, ullutsinni nunap inuisalu ilusilersugaanerannik sunniisimasoq.* Assilialiamini akuleriisitsinerata kinguneraa oqaluttuarisaanerup inuiaqatigiillu akornanni isiginneriaatsit assigiinngisitaarnerillu nutaat ersersinneqarneri, assiliamilu kulturit naapisinneqarneri pillugit takunnittup nammineq qanoq inissisimanini eqqarsaatersuutigisariaqarpaa.
Ivínguak’ Stork Høegh Eqqumiitsuliornermik Ilinniarfimmi ilinniartuusinnarluni Århus Kunstakademimi mix medie/grafik ilinniarsimavaa. Århusimi Teknisk Skolemi mediegrafikeritut ilinniarnini aallartissimavaa Københavnimilu naammassisimallugu.*** Ukiut arlallit Kalaallit Nunaata Radia & tv-mi sulisinnarluni 2021 Eqqumiitsuliornermik Ilinniarfimmi aqutsisunngorpoq.
Allaaserinnittoq: Karoline Støjbjerg Sejersen. 2023.
X: Allamiorpasissoq imaluunniit takornarnartoq. Tuluttut: exotic. Qallunaatut: eksotisk.
Najoqqutarisat:
* Lundberg Hansen, Stine. Ivinguak Stork Høegh viser, at det eksotiske er en kategori, der afhænger af, hvem der ser. Kunsten.nu, 15. juli 2021: https://kunsten.nu/journal/ivinguak-stork-hoeegh-viser-at-det-eksotiske-er-en-kategori-der-afhaenger-af-hvem-der-ser/
** Betak, Jens. Farlig skønhed: Lupinen kvæler lokale planter i Sydgrønland. KNR.gl, 8. juli 2019: https://knr.gl/da/nyheder/farlig-sk%C3%B8nhed-lupinen-kv%C3%A6ler-lokale-planter-i-sydgr%C3%B8nland
*** KIMIK ukiut 20 år. milik publishing. 2016.