Oqaasiitsut // De sprogloese

Jukke Rosing & Marte Lill Somby
28.10. – 28.11.2021

Jukke Rosingip Marte Lill Sombyllu assilialiaat Blok 2-mit 9-mut takuneqarsinnaapput. Assit eqqumiitsuliat Kalaallit Nunaannit Saamillu nunaannit pinngortitanit kulturiniillu takutitsipput.

Rosing aamma Somby oqaasiitsutut taaneqartartut ilagaat. Rosing kalaaliuvoq, kalaallisulli oqaluttuunani. Somby saamiuvoq, saamisulli oqaluttuunani. Saqqummersitsineq aqqutigalugu oqaasiitsuunertik apeqqusersorpaat. Kiap kinaanersutit aaliangertarpaa, kiallu sumiuunerit aalajangertarpaa? Qaqugukkut piviusarpit, qaqugukkullu piviunak? Kiap kinaassutsimut piumasaqaatit aalajangertarpai, kiallu piumasaqaatit siumorsimaneritit nakkutigissavai akueralutilllu?

Rosingip Sombyllu peroriartornerminni oqaasiitsuunertik peqqutigalugu akuerineqarnissamut inissaqartitsinnginneq kinaassutsimillu ularussineq misigisarsimavaat. Aaliangersimasumik kultureqarneq, taamaakkaluartorlu kulturip avataanut inissinneqartarneq misigisarsimavaat. Inuttut nalikinneruneq, saamiviunngitsutut, kalaaliviunngitsutut. Oqaasiitsuunertik peqqutigalugu inuttut mianernassuseqalerneq misigisarpaat, taannalu suminngaanneersuunerannut kinaassusaannullu tunngavigisassarisaannut sunniuteqartarluni.

Assilialiaminni saamit kalaallillu assuutaat, pinngortitaq nunalu kulturinut marlunnut ilisarnaatitut takussutissiaraat. Assigiinngissutsit takutippaat, aammali assigiissutsit takutillugit, soorlu assimi ”In This Together” saamit kamippai skallit kalaallillu kamii uumasup niaquata saarnga ilanngullugu takutinneqartut.

Oqaasiitsuuneq mianernassuseqarnerlu Rosingip Sombyllu assilialiaanni sammineqartuupput. Inuit mianernassusaat, pinngortitap oqaluttuarisaanerullu mianernassusaat Norgemi Kalaallit Nunaannilu pinngortitaq, tuttut, assuutillu atorlugit takutippaat.

Jukke Rosing Marte Lill Sombylu 2017-imi Nuuk Nordisk Kulturfestivaleqarmat naapeqqaarsimapput. Eqqumiitsuliortut allat arfinillit Nuuk Nordiskimut atatillugu Nuummi Eqqumiitsulianik Saqqummersitsivimmi ”Assinga 4×4”-mi saqqummersitseqatigisimavaat. Aatsaat taamani paasisimavaat Nuup Kangerluani Itivnerani tuttuuteqarfik aqqutigalugu siuaami oqaluttassartaat imminnut attuumassuteqartut.

Sombyp aataqqiiata 1888-imi Sermersuaq ikaarsimavaa, 1905-imilu Nuup Kangerluanukarsimalluni tuttuuteqarsinnaanermut periarfissat misissoriartorlugit. 1952-imi Rosingip aataavata Itivnerani tuttuuteqarfik aallartissimavaa, 1959-60-imilu Danmarkimut nuummat, Sombyp akkaavata Itivnerani tuttuuteqarfik ingerlatilersimallugu.

Saqqummersitsineq Nuuk Nordisk Kulturfestivalimut atatillugu saqqummersinneqarpoq.