Sapaammi oktobarip arferngani nal. 12 eqqumiitsuliaq erfalasoq nutaaq amuneqassooq. Erfalasoq eqqumiitsuliortup Jeannette Ehlersip ilusilersugaraa. Jeannette Ehlers qallunaajuvoq Caribiaminngaanniillu siuaaqarluni. Afrikarmiut ussataat Ghanami inussiaateqarfiup iigaanut graffititut allanneqarsimasoq tunngavigalugu erfalasuliani suliarisimavaa. Peqataagit, kaffisoqataallutit kaagisoqataallutillu, eqqumiitsuliortorlu naapillugu.
“Until the lion has his historian, the hunter will always be a hero” eqqumiitsulianngorlugu erfalasumi oqaatsit taakku atuarneqarsinnaapput, eqqumiitsuliortuulluni Jeannette Ehlers (in. 1973). Oqaatsit afrikamiut oqariartaaseraat, eqqumiitsuliortullu Ketami Ghanamiittumi, Fort Prinzensteinip parnaarussiviata naqqani iikkamut graffititut allanneqarsimasut nassaarisimavai. Oqaatsit Ehlersip suliareqqissimavai erfalasumullu aamarsuarmik sequtsikkamik allassimallugit.
Fort Prinzenstein 1784-imi qallunaanit napparneqarsimavoq, ukiorpassuarnilu atlantikup akianut inussiaatissanut katersuivittut atuussimalluni. Ullutsinni illukuinnangajaavoq, imarpiup ukiorpanni neriuineranit aserortigaalluni, sulili qanga amiilaarnartuliornerpassuarnut takussutissaalluni.
Inussiaatinngortussat kinguaavisalu akerliunerannut graffitip imarisaa ersersitsivoq, amerlasuutigummi taakku oqaluttuaat nunarsuatta killiup oqaluttuarisaanerannit peerneqartarmata.
Ehlersip erfalasuliamigut malugeqqusaa tassaavoq inuiaat europamiut imminnuinnaq eqqarsaatigalutik oqaluttuarisaanerminnik allattaaserinnittarnermikkut allat oqaluttuarisaanerannik tunulliussisarnerat, taamaaliornermigullu atornerluisimanerit, nungusagaasimanerit ataqqinassusiiagaasimanerillu akuerineqaqqullugit, soorlu ilaatigut aamma kalaallit oqaluttuarisaaneranni takuneqarsinnaasut.
Jeannette Ehlersip eqqumiitsuliortutut sulinermini dansk-caribiamiunik siuleqarnini atortarpaa. Eqqumiitsuliaasa ilarpassui apeqqutinut akiuminaatsunut tunngasarput, ilaatigut Danmarkip inussiaateqarfittut tunuliaqutaa, Danmarki pillugu oqaluttuarisaanermi allaaserisani mininneqakkajuttartoq. Suliamini oqaluttuarisaaneq, ataatsimuussuseq ilaqutariissuserlu, aammalu timi taalliornerlu suleqatigiissittarpai. Suleriaatsit nikerartut atorlugit isummat kinaassutsillu misissorneqartarput, eqqarsarnartumik tassanngaannartumillu.
Erfalasut assigiinngitsorpassuupput, soorlu naalagaaffiit erfalasui, arsaattartut klubbiisa erfalasui, erfalasut kalerrisaarutit, qinunermi erfalasut allarpassuillu. Erfalasut assigiinngitsorpassuarnik isumaqarsinnaapput – ulloqartarpugut erfalasulerfiusunik, pisortaqarfiit erfalasulerfissanik ulloqartarput, nalliuttorsiornerni erfalasulersortarpugut, ilaatigullu aamma ulluinnarni erfalasulersortarluta. Erfalasulersimagaagatta nalunaaqutsiisarpugut, ungasianiilluunniit attaveqatigiinnermut atorlugit. Erfalasut kinaassutsimut sumullu attuumassuteqarnermut tunngasinnaapput.
Nuummi Eqqumiitsulianik Saqqummersitsivik suleqatigalugu eqqumiitsuliortup Gudrun Haslep nunani assigiinngitsuni eqqumiitsuliortut allat qaaqqusimavai, Holmip Illuata silataani erfalasuliorfimmut erfalasulioqqullugit.
Suliamut aningaasaliipput Statens Kunstfond aamma Nuummi Najukkami ataatsimiititaliat.