Nunani Tamalaani Katersugaasiviit Ulluanni, maajip 18-iani, Nuummi Eqqumiitsulianik Saqqummersitsivimmi eqqumiitsuliat nutaamik uumassusilerneqarput. Pinnersaatit atorlugit suliaqartartoq, make up artist-ip Natascha Pedersenip inuit sisamat eqqumiitsulianngortippai. Suleqatigisimavaa Salon Priscillami nujalerisoq, Ulla Sievertsen.
Eqqumiitsuliat saqqummersitsiviup katersaataaniittut Nataschap isumassarsiorfigisimavai, tamatumalu kingorna eqqumiitsuliat uumassusillit sisamat ilusilersornissaat piareersarsimallugit, ilaatigut nutsat Ullamit suliarineqarlutik. Maajip 18-iani qitittartut Madelaine Gordon Graadahl aamma Alexander Montgomery-Andersen, isiginnaartitsisartoq Klaus Geisler, aatsaallu misiliisoq Bella Nielsen eqqumiitsuliarivaat.

Madelaine Gordon Graadahl ilulianngorsimavoq, imaluunniit sermersuanngorsimavoq. Nunap isikkuanik qalipagarpassuit, ingammik Emanuel A. Petersenimit qalipanneqarsimasut tunngavigineqarsimapput. Tuianut “sermimerngit” ikkussuuteqqapput, uagut isiginnaartut tarrarsorfigisinnaasatsinnik. Nunarsuup kiatsikkiartorneranut, tamannalu ilutigalugu sermersuit aakkiartornerannut uagut aamma pisooqataanerput, qanoq iliuuseqarsinnaanerput, aammali kissatsikkiartornerup uagutsinnut malunniuteqarsinnaanera tassani Nataschap aamma eqqarsaatigisimavaa, tarrarsorsinnaanissarpullu pingaartissimallugu.

 


Klaus Geisler tupilanngorsimavoq, saqqummersitsiviup katersugaataani tupilappassuit tunngavigalugit. Tupilaap oqaluttuassartaa qangamit ullumimut allanngoriartorsimanera aamma eqqarsaatigineqarsimavoq, inoqammik ajortumeerissutaasimagaluarluni maanna pinnersaatitut atorneqarnerusarnera takorloorlugu. Maajip 18-iani tupilaap amiilaarnarnera Klausimit ersersinneqarpoq, aammali ilusilulluni quiasunnartarnera takutinneqarluni.

 

 


Frederik Kristensen Kunngip eqqumiitsuliaa kipparissunik qalipaatinillu sammisalik tunngavigalugu Alexander Montgomery-Andersen eqqumiitsuliarineqarsimavoq. Kunngip kipparissut allanngorusuttarpai, ilaatigut titarnerit qalipaatillu atorlugit. Qalipaatit sisamat atukkajuttarpai, tassalu qalipaatit sisamaat toqqortutut ittarlugu. Uani sungaartoq, qorsorpaluttoq, tungujortoq aappaluttorlu atorsimavai. Tungujortoq aappaluttorlu akulerukkaanni tunguusanngortarpoq, aappaluttorlu taamaalillluni toqqorsimalluni. Kunngip kipparissunik qalipaatinillu isigisarnerput unammillerpaa, uumassusilerneqarneranilu inunnik isiginnittarnerit unammillerneqartutut illutik. Inuit kipparissumik isigissavagut? Inuit takuinnarlugit nalilersorsinnaavagut, imaluunniit imaaliallaannaq takoriaannaanngisatsinnik toqqortanik peqarsinnaappat?


Bella Nielsen siunissami inuit atortorissaarutillu akulerussimasut takorloorlugit suliarineqarsimavoq, qilertialu allisinneqangaatsiarsimalluni. Tassani Robert Holmenep eqqumiitsuliaa, Qanga maannalu, tunngavigineqarsimavoq. Siunissami inuit kikkuuppat, qanoq isikkoqarpat, suli ilisarnassanerlutik?

 

 

 

 

 

 


Eqqumiitsuliortoq (make up artist): Natascha Pedersen
Nujalerisoq: Ulla Sievertsen, Salon Priscilla
Eqqumiitsuliarineqartut:
Klaus Geisler
Madelaine Gordon Graadahl
Alexander Montgomery-Andersen
Bella Nielsen
Assiliisoq: Ceastian Rosing, Cloud Nine Media
Nipi: Siri Paulsen, Sialuk Productions

Aningaasaliisut qujaffigaagut:
Nuummi Najukkami Ataatsimiititaliaq
Tapiissuteqarfik Sermeq