ERFALASOQ // Ivínguak` Stork Høegh

Erfalasoq eqqumiitsuliaq “Zebraatiga” Ivínguak’ Stork Høeghimit suliarineqarpoq. Arnaq kalaaleq zebra hiisterigaa. Sumiippugulli? Issittumi? Afrikami? Uumasuusivimmi?

Høeghip nammineq assilisani nassaanilu atorlugit digitalimik katiteraluni assiliortarneq suleriaaseraa. Qalipaatit allanngortittarpai, qaavatigut titartaalluni qalipaalluniluunniit. Amerlanertigut assit akerleriilluinnaat atortarpai, soorlu arnaq inuk, 1900-kkut aallartinnerani assilisaq, zebralu. Ivínguak’ Stork Høeghip oqarnera malillugu, arnap zebramik ilisimasaqarnissaa qularnarpoq.

Høeghip ukiorpassuarni Kalaallit Nunaannit/Issittumit inuit, nunataa, Afrikallu uumasuinik nujuartanik assigiinngitsunik katiterineq sammisaraa. Assilialiani ArcticExotic-imik taasarpai. Issittoq aamma Afrika sumiiffivittut takorluukkatullu atorneqarput. Sumiiffiupput inunnit inuuffigineqarlutillu najugaqarfigineqartut, kisianni aamma sumiiffiviunngitsutut ittuupput, allamiorpasinnermik poorneqarsimasut, sinnattutut takorluukkalluunniit ittut. Sumiiffiillu taakku marluk nunasiaataasimanermik oqaluttuassartaqarlutik.

Zebrap inuullu ataatsimoorsinnerisigut, imminnut attuumassuteqanngitsuugaluartut, Høeghip sumiiffik, ulluinnaat, aammalu sumiiffiviunngitstut takornartaasut ersersippai. Takornartatut inissiisarnerup oqaluttuariaaseqartitsinerullu inuup isumassarsiaanit pilersinneqarsimanera ersersinniarpaa. Kalaallit Nunaat pillugu qanoq oqaluttuartoqartarsimanera apeqqusersorpaa, ullumikkullu Kalaallit Nunaat pillugu qanoq oqaluttuariaaseqarnersugut apeqqusersorlugu.

Ivínguak’ Stork Høeghip digitaliusunik katiteraluni assiliortarneri Kalaallit Nunaannut tunngaveqartuaannarput, assilli assigiinngitsunit katersaasarlutik. Inuiaqatigiit pillugit isummersornerupput, inuttullu inuiaqataasutut isummersuutaallutik, inuiaqatigiiunerullu tunngavianik oqaluttuat pillugit isummersuutaallutik.