Tarnip qupineri 9.9-6.11 2016

“Tarnip Qupineri” tassaavoq Nuummi Eqqumiitsulianik Saqqummersitsivimmi Gukki Nukap eqqumiitsuliaasa nutaat kusanartut ataatsimut saqqummersinneqartut qulequtaat. Saqqummersitsinerup allanit allaassutigaa, oqarasuaat angallattagaq atorlugu eqqumiitsuliat suliarineqarsimaneri, aamma eqqumiitsuliortup kinguaassiutimigut atornerlunneqarnermi kingorna aniguisimasutut artornartorsiorneranut tunnganera.

Eqqumiitsuliortoq kalaaleq Danmarkimiittoq sivisuumik uummammioqarsimavoq. Gukki Nuka arlalinnik eqqumiitsuliaqarpoq, kinguaassiutimigut atornerlunneqarsimasutut misilittakkamini misigisaminillu suliarinninnermini iluaqutigisaminik. Ajornartorsiut qajannarnerpaamik toqqaannarnerpaamillu takutinniarlugu aalajangersimavoq – tassalu imminermigoortillugu.

Eqqumiitsuliortup timini eqqumiitsuliamini sammivaa, tamakkunanilu timaa pigisanngorpoq, pilliutitut, ilusilersukkatut inuttullu. Ilaatigut sinnattutut; nunatut sermilittut imaluunniit orpippassuartalittut isikkoqarlutik.

“Eqqumiitsulianni inersimasutut timera atorpara, 14-nik ukiulittuunngitsoq, isumaqarama uannut pitsaanerpaasoq anniarneq, ilioriusissaaleqineq, kamak, aliasunnerlu takutikkukkit naggataatigullu oqaluttuarnissannik saperunnaarsimanera, ullumikkut kinaassusera atorlugu. Inuk ajortorsuarmik misigisaqarsimasoq ullumikkut illuatungaaniippoq, aatsaat taama nukittutigaluni.”

Gukki Nuka meeraalluni kinguaassiutimigut atornerlunneqarsimavoq – siullermik tarnimigut aqqanilinnik ukioqarnerminiit 14-inik ukioqalernissami tungaanut – tulliani timimigut 14-inik ukioqarnerminiit. Gukki Nuka siusinnerusukkut ilaatigut Nordatlantens Bryggemi saqqummersinneqarsimasunik marriortarnerminik ilisimaneqarpoq, kisianni eqqumiitsuliani “Tarnip Qupineri” nangeqattaartut aatsaavissuaq saqqummersippai. Saqqummersitsineq pillugu nammineerluni imatut oqarpoq:

“Ukiuni eqqumiitsuliornermik suliaqarfinni inuiaqatigiinnut tunngassuteqartunut isummersortarsimanngilanga. Ajattorneqarnissamut kanngusaarneqarnissamullu ersineq uanni qulangiisimavoq taamaattumik suaartarsinnaasimanngilanga. Ukiunili kingullerni kamanneq allanillu ikiuerusunneq annertusiartorsimavoq, neriuutaarunneq ilioriusissaaleqinerlu pigiinnarsinnaajunnaarnissaata tungaanut.”

Misigisat misigissutsillu takkukkaangata eqqumiitsuliat pinngortarput. Pigisamini atortussaa qaninnerpaaq tassaavoq oqarasuaat angallattagaq, taannalu atorlugu pimoorunneruleraluttuinnarlugu eqqumiitsuliortalerpoq. Eqqumiitsuliat saqqummersinneqartut pilersippai – tassa inussaminik oqarasuaatip angallattakkap titartaanermut atortuinik titartartarlugit. Tamanna aniguiniarnertut aallartippoq, kisianni paquminartuujunnaarsitsinissamik kissaateqarnini nukittorsaatigisimavaa, Henrik Thomsenimip upernaaq nunatsinni oqaluttuamik Gukki Nukap oqaluttuaanut assigusmik saqqummerluni oqaluttuartumat.

“Tarnip Qupineri” septembarip ulluisa arfineq-pingajuanni nal. 17.00 ammarneqarpat Asii Chemnitz Narup oqalugiassaaq aamma eqqumiitsuliortoq najuutissaaq. Saqqummersitsineq 2016-imi novembarip ulluisa arfernata tungaanut takuniarneqarsinnaavoq. Saqqummersitsinermut atortussat atuartunik angajullernik ilinniarnertuunngornianullu atuartitsissutissat ilanngunneqassapput. Saqqummersitsineq upernaaru Nordatlantens Bryggemi takuniarneqarsinnaassaaq soorluttaaq atuartitsinermut atortut aamma ikinnerusunillu saqqummersitat ilaatigut Ilulissanut, Paamiunut, Nanortalimmut Narsamullu angallanneqassapput, sulilu illoqarfinnut amerlanerusunut apuunnissaat sulissutigineqarluni.

Saqqummersitsineq Nuummi Eqqumiitsulianik Saqqummersitsiviup suliarisimavaa, Namminersorlutik Oqartussat Tips- og Lottomidler aqqutigalugit aningaasanik tapiisuupput, aammattaaq Royal Arctic Line-i aamma Nordatlantens Brygge tapiisimapput.

//

Gukki Nukap saqqummersitsinera ”Tarnip qupineri” tunngavigalugu ilinniartitsissusiorsimavugut, 9.-10. klassinut, GU-rtunut niuernermillu ilinniartunut tulluarsakkanik. Saqqummersitsineq Nuummi Eqqumiitsuliornermik Saqqummersitsivimmi takuneqarsinnaavoq ulluni 9/9 – 6/11.

Ilinniartitsissutit eqqumiitsuliornermi assinillu misissueqqissaarnermut (billedanalyse) tunngaveqarput, eqimattakkaarluni ilaatigullu ataasiakkaarluni suliarineqartussat. Suliassat ilinniartitsisunit suli tulluarsarneqaqqissinnaapput, ilinniartitsisunillu tamanit ammasumik atorneqarsinnaallutik.

Uani ilinniartitsissutit aasinnaavatit, pappialanngorlugillu anisillugit:

Atuartut suliassaat, kalaallisut qallunaatullu: uv-opgaver-til-revner-i-sjaelen

Ilinniartitsisut malittarisassaat: laerervejledning-tarnip-qupineri-kal // laerervejledning-revner-i-sjaelen-dk

//

4.-7. .klassinut MIO akeqanngitsunik atuartitsissutinik suliaqarnikuuvoq, taaguuteqarput ”Uangaana timiga! – Det er min krop!”.

Atuarfiup pingeriinngippagit, ugguuna piniarneqarsinnaapput mio@mio.gl.