UUMMATIP TAKUSANI PUIGORNEQ AJORPAI – Sigrun Gunnarsdóttir

Augustip 23-anit septemberip sisamaata tungaanut eqqumiitsuliortoq savalimmioq Sigrun Gunnarsdóttir piviusulersaarummik immiussinermut atatillugu Nuummi Eqqumiitsulianik Saqqummersitsivimmi saqqummersitsissaaq.

Eqqumiitsuliortoq savalimmioq Sigrun Gunnarsdóttir saqqummersitsinermi ”Uummatip takusani puigorneq ajorpai”-mik qulequtalimmi ilaqutariit pilluartut aliasuttullu, inuit akornanni attavigiinnerit, piniartut, qimmit, nuna sikumik qallersimasoq, aammalu inuit pinngortitallu ataqatigiinnerat takutissavai. Gunnarsdóttirip qalipagaasa Kalaallit Nunaanni uummataata misigisimasai inuunerlu qanoq innersoq ataatsimut takutippaat, qalipakkamini ilisarnaataasunik assikkut takutitsilluni angissutsinillu pinnguarinnilluni.

Saqqummersitsineq sivikitsuinnarmik pop-up-itut takutinneqassaaq, saqqummersitsivimmi qalipakkat aqqaneq pingasut takutinneqarlutik. Sigrun Gunnarsdóttir pillugu piviusulersaarummik kusanartumik filmiliornermut atatillugu saqqummersitsineq pilersinneqarpoq.

Sigrun Gunnarsdóttirip assinik pilersitsisarnermini ilisarnaatit atukkajuttarpai, upperisarsiornermut tunngasut ilaatigullu surrealistiskiusunik, tassa piviusoorpalaartunik eqqumiilluinnartunik, imaqartarlutik. Eqqumiitsuliamini assigiinngitsut ilisarnartut atortarpai, kisiannili pissusissamisuunngitsunik ataqatigiissaarnilersorlugit angissusaallu allanngortarlugit. Eqqumiitsuliaani inuunermut toqumullu ilisarnaatit takussaapput, inuillu assigiinngitsunik utoqqaassusillit sammineqarlutik; inoorlaat, meeqqat, inuusuttut, inersimasut utoqqaallu, aammalu naasut naajorartut, ilaat mikisut ilaallu alliserujussuarneqarsimasut. Gunnarsdóttirimmi eqqumiitsulioriaatsimini angissutsinik pinnguarneq pissusissamisuunngitsunillu ataqatigiissaarineq ilisarnaatigaa. Qalipaatinik ikitsuinnarneq atuineq qalipaaffissallu qaavata takutinniakkaminut tunngatillugu atorsinnaaneranik suliaqartarneq eqqumiitsulioriaatsimini aamma immikkut ilisarnaatigaa. Tassuunatigut eqqumiitsuliortup suliami oqaluttuaanera ersarissartarpaa; eqqumiitsuliorluni oqaluttuarneq itinerusumik oqariartuutilik. Eqqumiitsuliai sinnattorpalaarput, eqqarsaatersuuteqarpalaarput, qaniginnippasipput, aammalu ilisarnaatinik atuinera ilisarnartoqarluni aappaatigulli takornartaalluni; imminermininngaanneersumik takutitsilluni aappaatigulli imminut silataaniittutut qimerloorsimatilluni takutitsilluni.

Sigrun Gunnarsdóttir pillugu

Sigrun Gunnarsdóttir (in. 1950) Det Kongelige Danske Kunstakademimi eqqumiitsuliortutut ilinniarsimasuuvoq (1973-1980). Eqqumiitsuliortutut suliai Savalimmiuni Eqqumiitsulianik Saqqummersitsivimmi, Savalimmiuni atuarfinni arlalinni illunilu allani takuneqarsinnaapput, aammattaaq katersugaasivinni eqqumiitsulianillu saqqummersitsivinni arlalippassuarni saqqummersitsinikuulluni, ilaatigut Japanimi, USA-mi, Kinami, Tysklandimi, Sverigemi, Ålandimi, Kalaallit Nunaanni, Østrigimi, Norgemi, Savalimmiuni Danmarkimilu. Sigrun Gunnarsdóttirip suliai Danmarkimi Kunngikkormiut eqqumiitsulianik katersaavisa akornanni nassaassaapputtaaq. 2021-mi Sigrun Gunnarsdóttir Savalimmiuni kultureqarnermut naalakkersuisoqarfimmit kulturikkut nersornaaserneqarpoq.

Saqqummersitsineq Nuummi Eqqumiitsulianik Saqqummersitsivimmi marlunngornermi augustip 23-ani nal. 16-18 ammaanersiorneqassaaq, eqqumiitsuliortorlu aamma peqataassaaq.