Katersugaasiviit // Museums festival 17.5-21.5 2017

Nuummi Eqqumiitsulianik Saqqummersitsivimmit aamma Nunatta Katersugaasivianit, Nunattta Atuagaateqarfia suleqatigalugu ulluni 17. – 21. maj ICOM-ip Nunat Tamalaani Katersugaasiviup Ullorititaa malunnartinniarneqassooq. Meeqqanut inersimasunullu sammisassaqartitsinikkut pisoqartitsinikkullu ingerlanneqassooq.

Download program : museumdayprogram

ICOM-ip nunat tamalaani katersugaasivinnut ullorititaa ukiut tamaasa silarsuarmi katersugaasivippassuarnit malunnartinneqartarpoq. Ukioq manna immikkut sammineqassapput oqaatigineqarneq ajortut, oqaatigineqartartut oqaatigineqarnerlu ajortut akornanniittut, saqqummerseqqanngitsullu.

Katersugaasivik katersukkanik ilioraaviinnaanngilaq. Katersugaasivik aamma inuiaqatigiinnut attuumassuteqartussaavoq. Katersugaasiviup ilisimasat, alapernaakkusulertitsineq, paasisassarsiorusulersitsinerlu neqeroorutigisussaavai.

Katersugaasivik mattusseqqasuunngilaq, illoqarfimmulli ilaavoq – pilersaarusiorneqarsimanerani ilusilersorneqarsimaneranilu. Ulluni 17. – 21. maj katersugaasivinni assigiinngitsunik pisoqartassooq, aammali Nuummi piffinni assigiinngitsuni pisoqartassooq.

Pingasunngornermi maajip 17-ianiik sapaatip maajip 21-iata tungaanut qassinilluunniit ukiulinnut soqutiginartoqassooq.

Inersimasunut illoqarfiit ilusissaannik pilersaarusiortarneq, illussanik titartaasarneq aamma illoqarfinni ilisarsaasartut pillugit oqalugiartoqarlunilu saqqummersitsisoqassooq.

Nunatta Katersugaasiviata saqqummersitaata akornannut eqqumiitsuliat allallu akulerutsinneqassapput. Soraarnerup nalaani Pia Arke aamma katersugaasiviup ulluinnarni takutinneq ajugai pillugit takornariartitsisoqassooq.

Eqqumiitsuliortoq Finlandimeersoq, Inkeri Jäntti, arnat misigisartagaallu sakkortuut pillugit saqqummersitsissooq.

Nuummi Eqqumiitsulianik Saqqummersitsiviup Pia Arkep videoliaa pisaareqqammerlugu saqqummersitsivimmi takuteqqaassuaa.

PROMIS aallartinneqassooq, digitalimik atortorissaarutikkut Nuummi misigisanik piumasut avitseqatigiffigisinnaasaat.

Meeqqanut saqqummersitsineq Aqipi, Naja Rosing-Asvidip atuakkiaaneersoq, Nuummi Eqqumiitsulianik Saqqummersitsivimmi ammarneqassooq. Aqipili allani aamma takuneqarsinnaassooq; Nunatta Katersugaasiviani ujarneqarsinnaassooq, imaluunniit saqqummersitsiviup, atuagaateqarfiup katersugaasiviullu akornanni ujarneqarsinnaassooq. Aamma atuagaateqarfimmi meeqqerivinneersut Aqipimik atuffanneqassapput. Atuartut Kofoed Skole-minngaanersut iluliarpassittumik sanasimapput. Atuagaateqarfiup saavani takutinneqassalluni, meeqqallu taakungarlutik misigisassarsioriartorsinnaapput.

Pilersaarutit Kommuneqarfik Sermersuumiit aamma Namminersorlutik Oqartussanit aningaasaliiffigineqarput.