TUPILAPPASSUIT // 7.12.18 – 17.3.19

Sisamanngorneq decembarip arferngani nal. 17 saqqummersitsineq Tupilappassuit Nuummi Eqqumiitsulianik Saqqummersitsivimmi ammaanersiorneqassaaq.

Saqqummersitsineq eqqumiitsuliortut arlalippassuit suliaannik takutitsiffiussooq. Eqqumiitsuliortut tamarmik immikkut tupilaap qanoq isikkoqarneranik sammisaqarput; Anne-Birthe Hovep (1951-2012) suliai ilusilersuinerit nutaajunerusut, Mike Kristiansenip suliarisimasai (in. 1971) graffitilioriaatsinit isumassarsiarisimasai, aammalu Gukki Nuka Willsen Møllerip (in. 1965) marraq atorlugu tupilannik nuilaqusiaa nutaaliaasoq. Eqqumiitsuliortuullunilu animatoriusup Maria Kreutzmann-ip saqqummersitsiviup tupilannik katersugaatai aamma nutaaliaasumik takusassiarissuai.

Pileqqaarnerani tupilak tassaasimavoq anersaapiluk, akeqqamut ajortumeerisussanngorlugu aallartinneqartartoq. Europamiut Kalaallit Nunaannut tikittaleramik tupilak takorusuttarsimavaat, taamaattumillu kalaallit tupilak assilillugu qiperuisalerput. Qiperukkat tamakkua taamanili tammajuitsussatut nuannarineqalerput, ullumikkullu oqaaseq tupilak atorneqaraangat taakku pineqartarput.

Tupilaap isumaa ukiuni 100-ni kingullerni malunnartumik allanngorsimavoq. Saqqummersitsinermi takutikkusupparput kalaallit eqqumiitsuliortut nutaajunerusut tupilannik nutaarluinnarmik samminnittarnerat. Tamarmik apeqqummut uunga akissutisinissamut oqariartuuteqarput: Ukioq 2018-imi tupilak sunaava?

Meeqqanut GU-milu atuartunut ilinniartitsissutit saqqummersitsinermut ilaapput. Suliassat ilagaat saqqummersitsiviup tupilaatai inuttaralugit atuartut namminneq filmiliortinneqarnissaat. Saqqummersitsinermi nipilersukkat tupilannik eqqaasaqartut aamma tusarnaarneqarsinnaapput.

Saqqummersitsineq qaammatini pingasungajanni sivisussuseqassaaq, piffissallu taassuma iluani saqqummersitsinermut tunngasunik aaqqissuussisoqartarumaarluni.

Saqqummersitsineq aaqqissuussinerillu Tips- og Lottomidlernemit, Sermeq puljemit, Royal Arctic Linemillu taperserneqarpoq, eqqumiitsuliallu ilaat Nunatta Katersugaasivia Allagaateqarfianillu atukkiussaallutik.

EQQUMIITSULIORTUT

Anne-Birthe Hove (1951-2012), Arnannguaq Høegh, (f. 1956), Coco Apunnguaq Lynge (f.1991), Gukki Nuka Willsen Møller (f. 1965),
Jakob Maqe Nielsen (f. 1982), Jessie Kleemann (f. 1959), Johan Markussen (1906-1994), Jonatan Brüsch (f. 1986),
Kârale Andreassen (1890-1934), Maria Kreutzmann (f. 1985), Mike Kristiansen (f. 1971), Pia Arke (1958-2007), Rikke Diemer.

DOWNLOAD

PAASISSUTISSAT KAL  –  FORMIDLINGSFOLDER DA

ILAQUTARIIT SAMMISASSAAT KAL –  FAMILIEOPGAVER DK

ATUARTITSISSUTIT 1. -3. KLASSE

Eqqumiitsuliortunit assigiinngitsunit tupilaap suliaanera misissussallugu ataatsimoorluta saqqummersitaq Tupilappassuit takuniassavarput. Aamma tupilaat saqqummersitsiviup pigisaaniittut nassaarissavagut. Sunaasoruna, qanoruna isikkulik? Kingorna atuartut namminneerlutik modellervoks-imik tupilammik ilusilersuissapput. Naggasiullugu atuartut tamarmik immikkut tupilaliaminnik ilisarititsissapput.

Nittartakkami paasisaqarnerugit Kulturikkut isumassarsiorfik // Ugguuna piffissamik inniminniigit kunstmuseum@sermersooq.gl

ATUARTITSISSUTIT 4. -10. KLASSE

Ullutsinni tupilak pillugu eqqumiitsuliat misissussallugit atuartut saqqummersitsineq Tupilappassuit takuniaqqaassavaat. Kingorna suleqatigiikkaarlutik tupilaat inuttaralugit filmeeraliussapput, taannalu klassip sinneranut takutissavaat. Saqqummersitsiviup Ipad-it, programmi tupilaallu filmiliornermi atorneqarsinnaasut pigivai. Naggasiullugu filmiliaat takussavagut.

Nittartakkami paasisaqarnerugit Kulturikkut isumassarsiorfik // Ugguuna piffissamik inniminniigit kunstmuseum@sermersooq.gl