KATERSUGAASIVIIT ULLUAT 2020

Ataasinngorneq maajip 18-iat tassaavoq Katersugaasiviit Ulluat, ICOMimit ullulerneqarsimasoq. Ulloq nunani tamalaani ullorsiutigineqartarpoq, ukioq mannalu aamma Nuummi Eqqumiitsulianik Saqqummersitsivimmi ullorsiutigineqassalluni. Eqqumiitsuliorluni erfalasuliaq nutaaq Holmip Illuani amuneqassaaq, saqqummersitsinermilu ”Inuunitta nalaani” eqqumiitsuliortut marluk naapinneqarsinnaassallutik.

Ukiut tamaasa katersugaasiviit ulluat aaliangersimasumik qulequtaqartarpoq. Ukioq manna qulequtaavoq: ”Katersugaasiviit naligiissusermut: Assigiinngisitaarneq
aamma akuutsisineq.” Nuummi Eqqumiitsulianik Saqqummersitsivik ulloq taanna marlunnik pisoqartitsissaaq, ammassallunilu nal. 13-18.

”Ullaakkut erfalasulertarneq, unnulernerani peertarlugu, aqaguanilu erfalasuleqqittarneq. Uteqattaartuarpugut – aamma eqqumiitsuliortutut. Inuunerup ilagiinnarpaa. Uteqattaarineq toqqissisimanermik tunniussisarpoq. Ilitsoqqussat ileqquliuutillu inuunitsinni uivernarfeqartaqisumi naleqqatut aallaavissatullu atortarpagut. Allaat sianiginngisatsinnik iliuuserisartakkagut uteqattaartakkagut, iliuuserineri tamaasa peqqissimissutigisartakkagut, immitsinnut ilisimanitsinnut attuumassuteqarmata sianiginngisatsinnik uteqattaartagaraagut.” Eqqumiitsuliortup Jacob Borgesip erfalasuminut aallaavingisani taamatut nassuiarpaa. Holmip Illuani 2020-mi eqqumiitsuliatut erfalasuliani arfiniliusuni Jacob Borgesip erfalasuliaa siulliullugu amuneqassaaq. Gudrun Haslep Nuummi Eqqumiitsulianik Saqqummersitsiviullu ERFALASOQ//FLAG 2019-imi suleqatigiillutik aallartippaat. Eqqumiitsuliorluni erfalasuliaq Holmip Illuani ataasinngornermi maajip 18-iani ullup qeqqanut amuneqassaaq.

Ulloq taanna kingusinnerusukkut, nal. 15-18, Nuummi Eqqumiitsulianik Saqqummersitsivimmi saqqummersitsinermi ”Inuunitta nalaani” Paninnguaq Lind Jensen aamma Paarma Brandt naapissinnaavatit. Paninnguaq Lind Jensenip assit aamma Inuit kakiorneri pillugit video saqqummersippai. Paninnguaq Lind Jensenip Kalaallit Nunaanni Inuit kakiornerinik uummarissaqqiisut ilagaat. Kakiornerit inuiaassutsimik ersersitsisuupput, Inuttullu kinaassusermik tiguaaqqinnertut illutik.
Paarma Brandtip eqqumiitsuliaa ”Mission fuldført?” kalaallit qallunaallu kultuurikkkut naapinnerannut tunngavoq, ullutsinnilu kultuurit akornanni atassutinik nassaassaqarneranut tunngalluni. Atassutit ujalussianik aappaluttunik ilusilersorsimavai.

Peqataaneq akeqanngilaq, piumasullu tamarmik Katersugaasiviit Ulluanni peqataanissamut tikilluaqusaallutik.