KIMIK // 4.6 – 27.7.17

Nunatsinni Eqqumiitsuliortut peqatigiiffiat KIMIK aasaanerani Nuup eqqumiitsulianik saqqummersitsiviani saqqummersitsissaaq. Saqqummersitsineq 3. juuni nal. 16 ammaanersiorneqassaaq. Saqqummersitat juulip 27-ata tungaanut takuneqarsinnaapput.

Ukioq manna eqqumiitsuliortut Buuti Pedersen, Naja Rosing-Asvid, Ivalo Abelsen, Rama King Nash, Ivan Burkal, Kristine Spore Kreutzmann, Lisbeth Karline Poulsen, Pierre Auzias, Paninnguaq Lind Jensen, Miki Jacobsen, Elvar Örn, Lisa Kreutzmann, Arnannguaq Høegh, Julie Edel Hardenberg aamma Ivínguak´Stork Høegh suliaminnik saqqummersitsisuussapput.

Ukiumut ataasiaannarluni kalaallit eqqumiitsuliaanik takuniaanissaq periarfissaasarpoq tamannalu pisarpoq Nunatsinni Eqqumiitsuliortut Peqatigiiffiat KIMIK ukiumoortumik saqqummersitsigaangat.

Assigiinngitsunik saqqummersitsisoqartarpoq titartakkanik, qalipatanik, naqitanik marriukkanillu saqqummersitallu 100-nik amerlassuseqarsinnaasarlutik. Saqqummersitsinermi saqqummersitat saqqummiunneqartut tamarmik nutaajussapput.

KIMIK pillugu

KIMIK 1995-imi pilersinneqarpoq taamanili amerlanertigut Kulturikkut illorsuatsinni Katuami ukiumoortumik saqqummersitsisarluni. Eqqumiitsuliortut 20-t sinnilaarlugit amerlassusillit peqatigiiffimmi ilaasortaapput taakkulu tamarmik eqqumiitsuliornermi ilinniarsimasuullutik. KIMIK Nuutoqqami ataatsimut atorneqartartumi sannaveqarpoq. Peqatigiiffik pillugu eqqumiitsuliortunullu attavissatut paasissutissat www.kimikart.com atuarneqarsinnaapput.