Emanuel A. Petersen (1894-1948) annertuumik kajumissuseqarluni 1920-miit 1948 tikillugu nunatsinni pinngortitamik kalaallillu qanga najugaqarfigisarsimasaannik qalipaasarsimavoq, Petersenip suliai ilisimaneqarluartut ilisimaneqannginnerusullu 150-it pallillugit Nuummi Eqqumiitsuliornermut Katersugaasivimmi takuneqarsinnaapput.
Emanuel A. Petersenip paasinninnera malillugu Qallunaat Nunaata Kalaallit Nunaatalu attaveqatigiinnerat nukittorsartariaqartutut isigisimavaa isumaqarlunilu ilaatigut Kalaallit Nunaata kusanassusersua qallunaanut takutittariaqartoq.
Nunatsinni pinngortitarsuup pinnissusaa Petersenimut pingaarnerpaatut inissisimasimavoq, nunatsinnilu ”qaamarngup” ersissinniartarneranut ilisimaneqarluarluni; seqerngup nunamut, sikumut immamullu saqqartaalersarneri eqqarsaatigalugit.
Isiginnaartitsisarfinni atortunik qalipaalluni pinnersaasartutut, marrarnillu assiliartalersuisartutut, imaani umiarsuarnut tunngasut immikkut ilisimasaqarfigalugit, ilinniagaqarfigigaluarlugit, Emanuel A. Petersenip 1924-imi taaneqartalerpoq ”Kalaallit Nunaata Qalipaasorsua”, ukiut sisamat ingerlaneranni Kalaallit Nunaanni pinngortitarsuup kusanassusersua uuliamik qalipakkatsigut ersersitsinerata kingorna.
Emanuel A. Petersen angusaqarumatuujuvoq, nunasiaaneq Qallunaat Nunaannullu attaveqarneq qaninnerulersikkumallugit, Kalaallit Nunaannut paasisassarsiorluni angalanissanut qinnuteqaasiortarpoq aningaasaliissutinillu pissarsisarsimalluni. Qallunaanut paasitikkusussimavaa Kalaallit Nunaanni assiliarsuartut ittumik pinnissusermik peqartoq, eqqoriarneqarporlu Petersenip Kalaallit Nunaannut tunngassuteqartut uulia atorlugu qalipakkat, akvareli atorlugu qalipakkat, ilutsit uulialu atorlugu titartakkat 2000-it pallillugit suliaqarsimassasoq.
Petersenip kissaatigisimavaa, Kalaallit Nunaanni najugaqarfigineqartut tamaasa inuunermi ingerlanerani angalatoorsuannguutigalugit tikikkumallugit. Angalanermini unamminartoqartaraluartoq perlussiornartoqartaraluartorlu Petersenip nunarput pillugu qalipagaani tamatigut qatsungallunilu seqinnarittarpoq.
Emanuel A. Petersenip ilisimaneqaatigaa, Kalaallit Nunaat tamakkerlugu uuliamik qalipagarsui kusanarluinnartut, ilisimaneqanngingajapporlu taakkua Qallunaat Nunaanni qalipagaasut. Eqqumiitsuliortup Kalaallit Nunaannut angalassatilluni taamaallaat nassartarsimavai titartaanermut atugassani aammalu akvareli, pisariunerusullu soorlu uuliamik qalipaatit qalipagassiarsuillu annoraamerngit nassartarsimanngilai. Ilusilersukkani akvarelillu aallaavigalugit uuliamik qalipaalluni inaarsartarsimavai. Nuummi Eqqumiitsuliornermut Katersugaasivimmi Emanuel A. Petersenip titartaqqaarsimasai saqqummersinneqartut arlallit takuneqarsinnaapput.