Nuummi Eqqumiitsulianik Saqqummersitsivimmi KIMIK ukiunik 30-nngortorsiorpoq
Kalaallit Nunaanni eqqumiitsuliornermi sammineqartut ukiumut ataasiarluni ataatsimoortumik takuneqarsinnaasarput, tassa eqqumiitsuliortut peqatigiiffiat KIMIK aasaanerani saqqummersitsinermik takutitsigaagata. Ukioq manna eqqumiitsuliortut 17-nit missaat eqqumiitsulianik hunnorujut missaannik takutitsissapput.
Saqqummersitsineq maajip 22-ani nal. 17 Nuummi Eqqmiitsulianik Saqqummersitsivimmi tamanut akeqanngitsumik ammaanersiorneq pissaaq. Ukiut 30-t matuma siorna eqqumiitsuliortut kattuffiat pilersinneqarpoq, taamaammallu nalliuttorsiutigineqarluarnissaa pilersaarutaavoq.
KIMIK 1995-imi pilersinneqarpoq, ukioq mannalu ukiunik 30-nngortorsiorluni. Taamanili Kalaallit Nunaanni eqqumiitsuliornikkkut suleqataasutut pingaarutilimmik inissisimalersimavoq. Ilaatigut eqqumiitsuliortut Buuti Pedersen, Kristine Spore Kreutzmann, Inik Silis Høegh, Miki Jacobsen aamma Lisbeth Karline Poulsen kattuffimmi ilaasortaapput. Saqqummersitsinerit siammasissumik takutitsiviusartutut ileqqoraat, soorlu qiperukkanik, qalipakkanik, marrianik, mixed medianik, installationinik (ininut ikkussanik), videolianik naqitikkanillu takutitsiviusarlutik. Ullumikkut eqqumiitsuliortut 24-t kattuffimmi ilaasortaapput.
Nalliuttorsiorluni saqqummersitsineq Avatangiisit-nik qulequtaqarpoq. Eqqumiitsuliortut tigussaasunik, kultuurikkut inuuniarnikkullu avatangiisaannut eqqumiitsuliornikkut sammisartagaannuttaaq tunngavoq. Eqqumiitsuliortutut imminnut avatangiiseriittarnerannut aamma tunngavoq.
Saqqummersitsinermut atatillugu allanik pisoqartarumaarpoq, ilaatigut immikkut misigisassaq TAMASSA aqqutigalugu eqqumiitsuliortunik KIMIK-imi ilaasortanik sisamanik saqqummiisitsisoqassaaq, qanilaartumik suleriaatsiminnik oqaluttuassallutik. Arfininngornermi maajip 24-ani unnukkut nal. 19 pissaaq, isissutissallu Nuummi Eqqumiitsulianik Saqqummersitsivimmi pisiarineqarsinnaassallutik.
Saqqummersitsineq ”Avatangiisit” 2025-imi maajip 22-ani ammassaaq, 2025-imi augustip naanerata tungaanut takusarneqarsinnaassalluni. Saqqummersitsineq Namminersorlutik Oqartussat Tips- og Lottomidleriutaanit taperneqarpoq.
Maajip 22-ani Nuummi Eqqumiitsulianik Saqqummersitsivik aammattaaq ukiunik 20-nngortorsiussaaq, KIMIK-ip ammaanersiornera ilutigalugu malunnartinneqassalluni.
Eqqumiitsuliortut saqqummersitseqataasut:
Ivalo Abelsen
Aka Høegh
Ivínguak’ Stork Høegh
Miki Jacobsen
Elvar Örn Kjartansson
Maria Panínguak’ Kjærulff
Lisa Kreutzmann
Kristine Spore Kreutzmann
Peter ’Kujooq’ Kristiansen
Lisbeth Karline Poulsen
Mike Lynge
Camilla Nielsen
Lena Augusta Olsen
Buuti Pedersen
Naja Rosing-Asvid
Nicholas Rosing-Petersen
Arnajaraq Støvlbæk