Meeraanermi angerlarsimaffik suua? Tamanna Nuummi innuttaasunut oqaluttuaritikkusupparput.

Pigisamik imaluunniit peqummik meeraaninni angerlarsimaffinnik takussutissiisumik, meeraaninni angerlarsimaffinneersumik imaluunniit tassunga eqqaanartumik peqaruit saqqummiunnissaa soqutigaarput. Pigisat taanna ilinnut qanoq isumaqartiginersoq pillugu oqaluttuaq ilanngullugu pigisat saqqummersitsinermut ilaatikkusupparput!

Nuuk Nordisk 2019-imi Niels Lyngep Illua saqqummersitsivigissallugu Nuummi Eqqumiitsulianik Saqqummersitsivik, Nunatta Katersugaasivia Allagaateqarfialu aamma Nuutoqaq – Nuuk Lokalmuseum suleqatigiissuteqarput.

Septemberimi katersugaasiviit suleqatigiittut pingasut nunaqartut pigisaannik katersissapput, meeraanermi angerlarsimaffik qulequtaralugu. Pigisat tamarmik oqaluttuartalerlugit katersorneqassapput; sooq pigisaq taanna meeraanermi angerlarsimaffimmut eqqaanarnersoq imaluunniit qanoq takussutissiinersoq.

Niels Lyngep Illua Gertrud Raskvej 24-imiippoq. Illu 1950-ikkunnitut pequteqarluni atatinneqarpoq, piffissamik taassuminnga oqaluttuartutut. Palasip Niels Lyngep illu pigisimavaa. Illu Nuutoqaq – Nuuk Lokalmuseum-imut atavoq. Illu marlunnik qulereeqarpoq; ataaniipput Niels Lyngep pigisimasai, qulaaniippullu ilioraaviit saqqummersitsiviit. Saqqummersitat qulaaniittut Nuuk Nordisk 2019 nalaani taarserneqassapput.

Niels Lyngep Illuani nuummiut pigisaat ilanngunniarpagut – LARM-imit (grafikeri Kenneth Olsson aamma tusagassiortoq atuakkiortorlu Jakob Fälling) toqqartorneqarsimasut aaqqissuunneqarsimaullu. LARM 2015-imi aamma 2017-imi Nuuk Nordiskip nalaani tamatumalu kingorna Nuuk nuummiullu saqqummersissimavaa, ilaatigut Kalaallit Nunaanni eqqumiitsuliorneq kulturilu pillugit atuagassiaq Neriusaaq suleqatigalugu.

LARM Niels Lyngep Illua aallaavigalugu suliaqassaaq kiisalu sammisaq meeraanermi angerlarsimaffik aallaavigalugu illoqarfimmi workshoppertitsillutillu saqqummersitsissapput.

Inini allerni katersugaasiviit taakku pingasut tusarnaagassiamik podcastimik sanaleruttorput, Niels Lyngep paniata Lisa Lynge Hesseldahl-ip, Gertrud Rask Vejimi meeraanermi angerlarsimaffimmini oqaluttuaanik imaqartumik.

Meeraanermi angerlarsimaffik pillugu saqqummersitsineq Niels Lyngep Illuani Nuuk Nordisk Kulturfestivalimi 6.-13. oktobarimi pisussami takusarneqarsinnaassaaq. Pigisat tamarmik qularnaatsumik toqqorneqassapput, paarineqassallutik kiisalu oktobarip qeqqata missaani saqqummersitsineq naammassereerpat piginnittunut utertinneqassallutik.

Pigisat taakkualu oqaluttuassartaat saqqummiussassat Nuummi katersugaasiviit pingasuusut ammasarfiini tunniunneqarsinnaapput.

Nuummi Eqqumiitsulianik Saqqummersitsivik – Nuuk Kunstmuseum: sisamanngorneq nal. 13-19 // tallimanngorneq, arfininngorneq, sapaallu nal. 13-17.
Nuutoqaaq – Nuuk Lokalmuseum: marlunngorneq aamma sisamanngorneq nal. 13 – 17 // sapaat 13 – 17.
Nunatta Katersugaasivia – Grønlands Nationalmuseum: marlunngorneq – sapaat nal. 13-16.