DDDDD – Duot Dát DD Dáidda tassaavoq saamit eqqumiitsuliortoqatigiit Dáiddadállu-kkut silami saqqummersitsinerat. Saqqummersitani nipaannerit, quiasaarnerit, ilusilersueriaatsit nutaat aammalu politikkikkut tusangiasaarutit takussaapput.
Saqqummersitsineq saamit nunaanni Norgemiittumi i Áltá/Altami Finnmarksløpetsimi kingusinnerusukkullu Guovdageaidnu/Kautokeinomi takutinneqareersimavoq, maannalu allanngorlugu Nuuk Nordisk Kulturfestivalimi takutinneqarluni.
Dáiddadállumi ilaasortat eqqumiitsuliortut Ann-Sofie Kallok Susanne Hættalu, eqqumiitsuliortoqatigiinni aqutsisut ilaat Máret Ánne Sara suleqatigalugu saqqummersitsineq ilusilersorneqarsimavoq. Nuup qeqqani blok 2-9 silataani saqqummersitsineq inissisimavoq, eqqumiitsuliat 14-it takuneqarsinnaallutik. Eqqumiitsuliortut saqqummersitseqataasut: Anja Saiva Bongo Bjørnstad, Anitta Suikkari, Hilde Skancke Pedersen, Máret Ánne Sara, Susanne Hætta, Ann-Sofie Kallok, Elle Sofe Sara.
Saqqummersitsineq maajip 25-anit 28-ata tungaanut Nuuk Nordisk Kulturfestivaleqarnerani takutinneqassooq, juunillu 25-ata tungaanut alakkarneqarsinnaassalluni.
Sisamanngornermi maajip 25-ani nal. 11-12 eqqumiitsuliortoq blok 2-9 eqqaani naapinneqarsinnaapput.
Dáiddadállu tassaapput eqqumiitsuliortoqatigiit Guovdageaidnu/Kautokeinomi 2014-imi saamit nunaanni Norgemiittumi pilersinneqarsimasut. Ullumikkut eqqumiitsuliortoqatigiit 24-nik ilaasortaqarput. Ilaasortat eqqumiitsuliortutut sammivinnit assigiinngitsuninngaanneerput suleqatigiikkajuttarlutillu. Eqqumiitsulioriaasermik ullutsinneersumik suliaqartartut ilaasortaapput, assiliivinnik assilialerisartut, filmiliortartut, assiliartaliortartut (grafisk design), atuakkiortut, nipilersortartut, qitinnermik ilusilersuisartut aamma joikertartut ilaasortaapputtaaq. Eqqumiitsuliortut tamarmik Guovdageaidnu/Kautokeinomi ilaasortaapput, silarsuarli tamakkerlugu angalallutik suliaqartarlutik. Ilaasortat ataasiakkaat pillugit eqqumiitsuliortoqatigiillu pillugit nittartagaanni atuaqqigit www.daiddadallu.com
Nuuk Nordiskimi Dine Arnannguaq Fenger-Lynge (ulluinnarni aqutsisoq), Ann-Sofie Kallok (eqqumiitsuliortoq saqqummersitsinermilu DDDDD-mi ilusilersueqataasoq), Anne Henriette Niilut aamma Beaska Niilas (siulersuisuni ilaasortaq) peqataassapput.