Puilanerit // Grafisk Værksted 1972 – 1980

 

Grafisk Værksted 1972-imi ammarpoq, 1980-illu naalernerani Eqqumiitsuliornermik Ilinniarfinngorluni. Taamani Hans Lyngep Bodil Kaalundillu, tamarmik eqqumiitsuliortuullutillu atuakkiortuusut, Nuummi uffariartarfiusimasumi ammarsimavaat. Canadami Cape Dorsetimi naqiterivik isumassarsiuffiusimavoq. 1972-ip 1980-illu akornanni Grafisk Værkstedimi grafikki atorlugu naqitereriaatsinik pikkorissaasoqartarsimavoq, soorlu ujaqqanit naqiterisarneq, annoraaminernit naqiterisarneq, kanngussammit naqiterisarneq linoleummimillu naqiterisarneq.

Ilinniarfik piffissap ingerlanerani nuimasunik aqutsisoqarlunilu ilinniartitsisoqartarsimavoq, ilaatigut Emil Rosing, Jessie Kleemann aamma Arnannguaq Høegh. Ilinniartut Kalaallit Nunaanit tamanit tikittarsimapput, assigiinngitsunillu tunuliaquteqartarsimallutik, soorlu piniartut, aalisartut, sanaluttartut, angerlarsimaffinni ningiut, umiartortut inuusuttullu eqqumiitsuliornermik soqutigisallit. Taakku ilaat tassaasimapput Jessie Kleemann, Anne-Birthe Hove, Frederik Kristensen ‘Kunngi’, Aka Høegh aamma Thue Christiansen.

Grafisk Værkstedimit katersat Nunatta Katersugaasivia Allagaateqarfianilu inissisimapput, tassanngaanniillu naqitikkat 100-t missaat atorneqassallutik. Saqqummersitsinermi ilinniartut siammasissusaat takuneqarsinnaassaaq, naqitereriaatsikkut, sammineqartuni, ersersitseriaatsinilu. Sammineqartut assigiinngitsorpassuupput; asanninneq, pinngortitaq, avatangiisit qaninnerit, inuit assingi, piniarneq, silarsuarmit isumassarsiat aammalu ilisarnanngitsuliat.

Grafisk Værksted eqqumiitsuliornerup silarsuaanut arlalinnut aqqutissiuussisuusimavoq, 1980-imiillu Eqqumiitsuliornermik Ilinniarfik silarsuarmi eqqumiitsuliornermi ilinniarfissuarnut ingerlariaqqinnissamut tunngavilersuisuusarmalluni. Ilinniarfiup 1970-ikkunniilli Kalaallit Nunaanni eqqumiitsuliornerup ineriartorneranik nikisitseqataasuni pingaarnerit ilagingaat ilimanaateqarluinnarpoq. Taamaakkaluartoq ilinniarfik pillugu paasissutissanik pissarsiniarneq ajornakusoortarpoq. Sumi tamaani atuagassiani nassaassaasinnaasarpoq, atuakkani ikitsuinnarni eqqaaneqartarluni allagaateqarfimmilu pigineqartut amerlanatik. Aasap ingerlanerani saqqummersitsinermut atatillugu atuagassiamik katalogimik Eqqumiitsuliornermik Ilinniarfik suleqatigalugu saqqummersitsinissaq pilersaarutaavoq. Atuagassiaq aqqutigalugu paasissutissanik pissarsiornissaq ajornannginnerulissasoq neriuutaavoq.

Grafisk Værksted ilinniartuusimasut uku suliaat saqqummersinneqassapput:
Aka Høegh, Amalie Lennart, Angu, Ejnar Jensen, Elisabeth, Anne-Birthe Hove, Aqqa Geisler, Astrid Heilmann, Bent Warney, Ejnar Heilmann, Eliaser Qeqe, Elisa Olsen, Enok Absalonsen, Eva Marie Stoltz, Hans Manikutdlak, Henrik Johansen, Inukitsorujuk Quist, Jens Stach, Jeremias Karlsen, Jessie Kleemann, Johanne Simonsen, Jonas Zethsen, Kaka, Karl H. Olsen, Frederik Kristensen Kunngi, Lasse Davidsen, Malo Nielsen, Maqqa Karlsen, Marianne Jessen, Marie Lybert, Naja Kruse, Nikoline Kilime, Nuka Poulsen, Salomon Winding, Samo Kajussen, Thue Christiansen, aamma Tønnes Petersen.

Saqqummersitsinerup qulequtaraa “Puilanerit // Grafisk Værksted 1972-1980”. Ilinniartut eqqumiitsuliornerup silarsuaanut appakaannerat, eqqarsaataat isumassarsiaallu eqqumiitsuliani takussaasut aammalu ilinniarfiup ullutsinni Kalaallit Nunaanni eqqumiitsuliornerup tunngavilerssueqataaneranut qulequtaa tunngassuteqarpoq. Saqqummersitsineq katersat tunngavigalugit suliaavoq. Eqqumiitsuliortut, ilinniartuusimasut, naqitereriaatsit, ilisimariikkallu tunngaviginagit aaqqissuussaavoq.

Saqqummersitsineq Inuiattut Ullorsiornermi juunip 21-ani nal. 15 ammaanersiorneqassaaq, ukioq mannalu oktobarip aappaata tungaanut takusarneqarsinnaassalluni. Maanna Eqqumiitsuliornermik Ilinniarfiup aqutsisua, eqqumiitsuliortoq grafikeriusorlu Ivínguak’ Stork Høegh, ammaanersiornermi peqataassaaq.
Saqqummersitsineq Namminersorlutik Oqartussanit Tips og Lottomidlerimit aningaasalerneqarpoq, eqqumiitsuliallu Nunatta Katersugaasivia Allagaateqarfiatalu toqqortaasiviannit atorneqassallutik.