NATURE – HOME AND WORKPLACE
Kalaallit Nunaanni pinngortitaq pingaaruteqartumik inissisimavoq, nerisaqarfipput aammalu amerlasuut eqqissisimaffigisinnaasaat. Taamaattumik Nuummi Eqqumiitsulianik Saqqummersitsiviup NATURE // Home & Workplace Nuummi saqqummersissallugu sulissuteqarsimavoq. Saqqummersitsinermi qalipakkat angisuut minnerillu, qiperukkat, eqqumiitsuliallu ininut aaqqissuunneqarsimasut pinngortitamut tunngasut saqqummersitsinermi ilaassapput. Eqqumiitsuliortut aqqaneq marluusut Nunani Avannarlerneersuupput, Nuummeersoq Inuk Silis Høegh ilanngullugu.
Eqqumiitsuliortut aqqaneq marluk nunani avannarlerneersut suliatik assigiinngitsut atorlugit pinngortitaq pinngortitamilu suleriaasertik takutippaat, soorlu pinngortitami avatangiisinik arajutsisimannginneq, nukissaq, isumassarsiorneq, eqqissisimaarneq, takussaasumillu oqariartuuteqarneq. Saqqummersitsinerup pinngortitami, najukkami, eqqumiitsuliornermilu pissutsit misissuiffigai. Eqqumiitsuliortut pinngortitap tikikkuminarnera, pinngortitami najugartik kiisalu pinngortitap eqqumiitsuliornermut sunniutai saqqummersitsinerminni takutippaat.
Eqqumiitsuliortut saqqummersitsisut illoqarfik qimallugu pinngortitami najugaqarput, imaluunniit pinngortitaq eqqumiitsuliornermi eqqissisimaarfissatut isumassarsiorfissatullu atortarpaat. Avatangiisit, pinngortitarlu ilaasa eqqumiitsuliaminnut ilanngussimavaat, soorlu qalipaatini, atortuni assiliartaannilu, allallu pingaartissimavaat illoqarfik qimallugu eqqissisimasumiillunilu nipaatsumiilluni eqqumiitsuliornissaq. Saqqummersitsineq Island, Danmark, Sverige, Finland Kalaallit Nunaannillu eqqumiitsuliortunit peqataaffigineqarpoq. Kalaallit Nunaanniit eqqumiitsuliortoq Inuk Silis Høegh peqataavoq. Eqqumiitsuliortut saqqummersitsinissamut qaaqqusaasimasut tamarmik nunani tamalaani saqqummersitsisarnerminnit eqqumiitsuliortutut ilisimaneqartuupput.
Saqqummersitsinermut atatillugu worskhoppi periarfissaassaaq. Workshoppi atuarfinnut, GUX-imut NI-mullu sammitinneqartoq, angerlarsimaffik, pinngortitaq eqqumiitsuliornerlu sammineqassallutik. Kulturikkut isumassarsiorfiup quppernera alaatsinaaffigiuk.
Januaarip 18-iani 2020-mi Unnuk Kulturisiorfimmi Nuummi Eqqumiitsulianik Saqqummersitsiviup saqqummersitsinermi inuup pinngortitamut atassuteqarnera sammissavaa. Eqqumiitsuliorneq, assigiinngitsunik suliaqarfiusut ullormullu sammisassat aqqutigalugit pinngortitamik atuisinnaaneq pillugu inuit najuuttut paasiniaaffigineqassapput, ilaatigut pinngortitami susinnaanersugut qanorlu atorsinnaaneripput paasiniarneqarlutik. Unnuk Kulturisiorfimmi Nuummi Eqqumiitsulianik Saqqummersitsivik kiisalu sammisassat tamarmik akeqassanngillat.
Danmarkimi Johannes Larsen Museet-ip eqqumiitsuliortoq Lisbeth Eugenie Christensen suleqatigalugu saqqummersitsineq pilersippaat.
__
Royal Arctic Line ikiortigalugu karsit angisuut qulit Nuummut nassiunneqarput, aningaasaliisuullutillu Nuummi Najukkami Ataatsimiitsitaliaq aamma Den Obelske Familiefond.
Januaarip 9-ani 2020-mi suliarinnittoq Lisbeth Eugenie Christensen aamma Johannes Larsen Museet-imi aqutsisoq Jeppe Priess Gersbøll saqqummiussisoralugit Nuummi Eqqumiitsulianik Saqqummersitsivimmi saqqummersitsineq ammaanersiorneqassaaq.
Saqqummersitsineq 23. februar 2020 tikillugu takusarneqarsinnaassaaq.
Eqqumiitsuliortut peqataasut:
Andreas Eriksson
Anna Bjerger
Christina Malbek
Esko Männikkö
Hildur Bjarnadóttir
Inuk Silis-Høegh
Lisbeth Eugenie Christensen
Mikkel Carl
Per Ahlmann
Pétur Thomsen
Søren Assenholt
Søren Martinsen