Eqqartuussinerni piviusuni illit eqqartuussinerit qanoq issava aamma qanoq nunagisanni inatsit allanngortissagaluarpigit, naapertuunnerusunngorlugit?
Arfininngorneq septembarip ulluisa 14-iat nal. 13 Nuummi Eqqumiitsulianik Saqqummersitsivimmi Law Shifters ammaanersiorneqassaaq. Iikkamut nivinngagaassanngilaq, peqataasitsinermilli tunngaveqarluni saqqummiunneqassalluni.
Law Shifters tassaavoq eqqumiitsuliorneq innuttaasunut tunngasoq, eqqumiitsuliortumit Stine Marie Jacobsenimit (in.1977) pilersinneqarsimasoq. Eqqumiitsuliaq inatsisit tamallu oqartussaaqataanerat tunngavigalugit meeqqat inuusuttullu sammisaqartitsisarpoq. Law Shifters Nuummi Eqqumiitsulianik Saqqummersitsivimmi ukioq manna septembarip ulluisa 14-ianiit aappaangu martsip ulluisa 29-ata tungaanut takutinneqassaaq.
Eqqumiitsuliornermi suliniut tassaavoq inatsisinut maskiinaq. Nuummi Eqqumiitsulianik Saqqummersitsivimmiissaaq, pulaartut kikkulluunniit inatsimmik siunnersuummik allassinnaallutik. Siunnersuut inatsisinut maskiinap “iissavaa”. Siunnersuutit toqqakkat inatsisissatut allanneqassapput illoqarfiullu iluani takussaalerumaarlutik, aamma Law Shifters nittartagaanut (www.law-shifters.eu/category/1st-edition) ikkunneqarumaarlutik. Tamanna pissaaq Ilisimatusarfimmi Inatsisilerinermut Immikkoortoqarfik suleqatigalugu.
Eqqumiitsuliornermi suliniut Law Shifters aamma atuarfinnut tulluarsakkanik workshoppertitsisarpoq. Atuartut eqqartuussinerit piviusut aallaavigalugit eqqartuusisassapput, inatsisinillu nutaanik inuiaqatigiinni inuuffigisaaannut tunngavilinnik siunnersuusiortarlutik. Kommuneqarfik Sermersuup nittartagaani Kulturikkut isumassarsiorfiup ataani workshop pillugu sukumiinerusumik paasissutissarsisinnaavutit. Ileqqorissaarneq inatsisillu pillugit meeqqanut inuusuttunullu tulluarsakkamik atuakkamik saqqummersitsinermik kinguneqassaaq. Atuakkami inuusuttut inatsisit oqaluttuanngorlugit allassavaat, atuagarlu apriilip qaammataani 2020-mi saqqummissaaq.
Eqqumiitsuliat maluginiutit ammarsinnaavai, ulluinnaq allarluinnartut isigineqalersinnaanngorlugu, inuiaqatigiinnilu peqataaffigisatsinni paasinnilersitsisinnaalluni. Inatsisit suunersut paasissallugu suliniummit anguniarneqarpoq. Inatsisit kiap sanasarnerai aamma qanoq atuutsinneqarnersut. Inatsit tassaavoq politikkikkut uppernarsaat, inuit isumaannik ersersitsisoq, ileqqorissaarnermik isiginnittariaatsinut naapertuilluartuunermullu tunngasoq. Eqqartuussineq oqaluttuarisaanermit uppernarsaataavoq, piffissami pisumi eqqartuussinerup aalajangerneqarnerani inuiaqatigiinni ileqqorissaarnerup qanoq issimaneranik takutitsisoq. Eqqartuussineq 1980-imi pisoq, ullutsinni qanorluunniit allatut paasineqassagaluarpoq allatullu inerneqarluni. Piffissap ingerlanerani allanngoriartortoqartarnera atuarfinni meeqqerivinnilu sammisassatut ersersarneqassooq. Innuttaasut inuusuttut namminneq inissisimaffigisartik maluginarsinnaalissavaat, inuiaqatigiillu qanoq allanngoriartortarnerat malungigisinnaalerlugu.
Nuummi Eqqumiitsulianik Saqqummersitsivimmi Law Shifters arlalinnik suleqateqarpoq: meeqqat pisinnaatitaaffii pillugit sullissivik MIO, Meeqqat Ikiortigit, Ilisimatusarfimmi Inatsisilerinermik Immikkoortortaqarfik kiisalu Ilinniartitaanermut Aqutsisoqarfik/Uddannelsesstyrelsen.
Law Shifters Nordisk Kulturfondimit, Statens Kunstfondimit, Svend aamma Helene Junge fondianit, Nuummi Najukkami Ataatsimiititaliamit aamma Den Grønlandske Fondimit, Royal Arctic Linemillu tapiiffigineqarpoq.
Atuartitsineq
Law Shifters – Eqqartuussunermik aalajangeeqqinneq // 7.-10.kl + GUX, NI
Piviusumik eqqartuussissagaluaruit eqqartuussutit qanormita issagaluarpa, nunagisannilu inatsisit allanngortitissagaluarukkit qanormita naapertuunnerusunngortissinnaavigit?
Workshopimi suleqatigiissutissami eqqartuussimaneq naammassineqareersoq nalilersoqqillugu inernileeqqissapput, kingornali inatsisissamut siunnersuusiorlutik. Eqqartuussisimaneq pisimasuik paasiuminarsagaq pineqartullu ativiinik allassimasoqarunnaarsitaq ilinniartut piviusuusaartitaliarissavaat. Akunnerminni kikkut eqqartuussisuussanersut, unnerluussisuussanersut, illersuisuussanersut nævningiussanersullu inississinnarlugit eqqartuussinermi tunngavilersuutit namminneq isummatik malillugit iluarsaatissavaat, naggataatigullu eqqartuussut aalajangersartillugu.