Nuummi Eqqumiitsulianik Saqqummersitsivik suleqatigalugu eqqumiitsuliortup Gudrun Haslep nunani assigiinngitsuni eqqumiitsuliortut allat qaaqqusimavai, Holmip Illuata silataani erfalasuliorfi mmut erfalasumik eqqumiitsulioqqullugit.

Gukki Nukap 2016-imi saqqummersitsineq “Tarnip qupineri” Nuummi Eqqumiitsulianik Saqqummersitsivik suleqatigalugu saqqummersippaa, assit aqqutigalugit kinguaassiutitigut kannguttaatsuliorfigineqarnikuunermi kingunerlutitsinnera suliarisimaneri saqqummersilllugit. Tamatuma kingorna Kalaalllit Nunaat tamakkerlugu, Danmarkimi Savalimmiunilu angalaaruppaa maannakkullu Canadami Yukonimi saqqummersinneqarluni.

Eqqumiitsuliat imminut assililluni suliaapput, titartagaallutik mobiilimilluunniit assilisaallutik. Assini pixelit tamarluinnaasa mobilini atorlugu suliareqqissaarsimavai. Qajannassuseq misikkarissuserlu ersersinneqarput, aammali issanngunaannartumik kiserliorneq anniarnerlu ersersinneqarlutik. Oqallisigineqarneq ajortut, ajornartorsiutit aamma sammissallugit ajornakusoorsinnaasut allat sammineqarnissaannik Gukki eqqumiitsuliani aqqutigalugit inissamik ammaassivoq.

Saqqummersinneqartut ilaat erfalasutut eqqumiitsuliaavoq, suliniummut ERFALASOQ//FLAG-imut ilanngunneqarluni. Assilisaanani titartagaavoq. Nammineq peqilualluni inissisimalluni assia.

Gukki ukiuni kingullerni marlunni illersuisuuvoq, tassa kinguaassiutitigut kannguttaatsuliorfiginninnerit nipangiusimaannarneqartarnerat killilerniarlugu nammineq nalaassimasani oqaluttuarisaqattaarpai. Kingunerlutitsinini pillugit ammasuunera piviusulersaarutitut filmiliarineqarsimavoq, qulequtaralugu ”Pilluarneq ersigiunnaarpara”.

Erfalasoq nipaatsumik kaammattuutitut atorneqarpoq; nalaataqarnerlunneq, qajannassuseq, kannguttaatsuliorfiginninnerillu oqaloqatigiissutaanissaat pillugu, aamma eqqugaasumut eqquisumullu qanoq kinguneqartarnerannik qaqileriuaannarnissamut inissaqartitsiuarnissamik.

Erfalasoq eqqumiitsuliaq juulip aallaqqaataani Holmip Illuata silataani amuneqassaaq – piumasut tamarmik tikilluaqusaapput! Kaffi, tii qallersukkallu patitsitat sassaalliutaassapput.