Anne-Birthe Hovemit (1951-2012) katersat 2020-mi aasaanerani pisiarineqarput, Ny Carslbergfondet-imit aningaasalerneqarlutik. Maannamut katersat Nuummi Eqqumiitsulianik Saqqummersitsivimmi inissinneqaqqasimapput. Maanna katersat nalunaarsorneqalerput, taamaammallu saqqummersitsivik apriilip 25-anit maajip arfineq pingajuata tungaanut matoqqassaaq.
Eqqumiitsuliortup kalaallip Anne-Birthe Hovep (1951-2012) suliaata tamangajaasa pisiarinissaanut Ny Carlsbergfondet aningaasaliivoq. Taamani Statens Museum for Kunst, Nunatta Katersugaasivia Allagaateqarfialu, Nunatta Eqqumiitsulianik Saqqummersitsiviata Aningaasaateqarfia, aamma Nuummi Eqqumiitsulianik Saqqummersitsivik ataatsimoorlutik pisisuupput. Kalaallit Nunaata Danmarkillu akornanni katersugaasivilerinermi taama siammasitsigisumi ataatsimut pisineq taama ittoq aatsaat siullerpaamik taamani pivoq. Tassuunnannarluunniit eqqumiitsuliat katersaat taakku qanoq pingaaruteqartigineri takuneqarsinnaavoq.
Coronamik nappaalaneq peqqutigalugu nalunaarsuinissamut pilersaarutit arlaleriarlutik allanngortinneqartariaqartarsimapput, maannali aallartissinnaanngorluni. Statens Museum for Kunst-imi katersugaasivilerisoq Birgitte Anderberg apriilip naanerani Nuummut tikissaaq nalunaarsuinermi suleqataajartorluni.
Nalunaarsuinermut atatillugu saqqummersitsillatsiarnerit pop-up-it tallimat pilersaarutaapput, siullerlu Tundra-mik qulequtalik martsip aallartilaarnerani ammarluni. Allaaserisat nutaat tallimat aammattaaq pilersaarutaapput.
Anne-Birthe Hove kalaallini eqqumiitsuliortuni takusanik suliarinneqqittartuni sukuiaasartunilu siulliit ilagisimavaat, taamaammallu eqqumiitsuliornikkut nalunaajaataa inuiaqatigiinnut nalitoorujussuulluni. Kalaallit Nunaanni piffissani pingaarutilinni suliaqartarsimavoq. Kalaallit Nunaata amt-itut inneraninngaanniit, Namminersornerulerneq, 2009-milu Namminersulerneq pillugu isummersornera arlalitsigut malinnaavigineqarsinnaavoq. Eqqumiitsuliornikkut nalunaajaaneq immikkuullarissuuvoq, maanna kingunissamut qulakkeerneqarnera matussuserneqalersoq.
Nalunaarsuineq, saqqummersitsillatsiarnerit, allaaserinninnerillu Aningaasaateqarfik Sermermit aningaasaliiffigineqarput. Saqqummersitsillatsiarnerit Nuummi Eqqumiitsulianik Saqqummersitsiviup nittartagaani Facebookkianilu ukiup ingerlanerani nalunaarutigineqartassapput.