Frederik Kunngi Kristensenip, KIMIK-imi ataqqinaammik ilaasortaasup, eqqumiitsuliai qalipaatinik qaamanermut malussarissunik qalipanneqarsimasut saqqummersitsinermi takuneqarsinnaapput, aammalu Naleraq Eugeniusip qullernik eqqumiitsuliornera, Kunngip qalipagaanik allanngorartitsisoq misigineqarsinnaavoq, aammalu ini ulikkaarlugu nunamik assilisaq seqersinneqarsimassalluni nipilersorneqarlunilu.

Naleraq Eugenius qullernik eqqumiitsuliornermik suliaqartarpoq, Japanimilu qullernik digitalimillu eqqumiitsuliornermik isumassarsiortarluni. ”Qullilerissagaagama ini maluginiaqqaartarpara, periarfissanik assigiinngitsunik ujaasillunga. Saqqummersitsinermut uunga qulliit arriitsunnguamik allanngorartissallugit suliaraakka, allanngorneri malunnanngitsunngorlugit. Uannut aamma pingaaruteqarpoq, qalipaatit akulerunneqarpallaannginnissaat, taamaammat qalipaatit allanngorarneri qajassuartumik tulleriissaarnilersorpakka”, Naleraq qullilersornini pillugu taama oqarpoq. Qalipakkat qullilersornerlu ataatsimoorlutik silarsuaaqqamik qalipaatinik qullernillu imalimmik pilersitsivoq. Taamaalillutik eqqumiitsuliat allanngoraannavinnerisa qimerluuisut eqqumiitsulianik uteqattaarisitsillutik nutaanik takusassaqartuartitsipput.

Saqqummersitsinerup qulequtaa, Issittup qullii, marloqiimmik isumaqarnera Kunngip oqaatsinik pinnguallaqqinneranit pilersinneqarpoq. Qullernut ikumasartunut tunngavoq, aammali qullinut isitsinnit kuuttartunut tunngalluni. Ukiukkut issinnerani qullernut qaamanernullu assigiinngitsunut misigisartakkatsinnut tunngavoq, aammali ukiukkut anorimit isigut naapinneqaaraangata qullililertarnitsinnut tunngalluni.

Saqqummersitsineq arfininngornermi novembarip arfineq aappaani nal. 15 ammaanersiorneqassaaq, ilaatigullu Aqqaluk Lynge oqalugiassaaq.

Saqqummersitsineq Namminersorlutik Oqartussat Kulturimut aningaasaliissutaannit aningaasaliiffigineqarpoq.