Inuunitta nalaani // I vores levetid kalaallit inuiaqatigiit assigiinnginnerinik nersorinninneruvoq. Ersarissunik akissutissarsiorneq saqqummersitsinermi anguniagaanngilaq. Tigussaasumik massakkullu pisunik aallaaveqarpoq. Eqqumiitsuliortut tallimaaasut ukiut 40-t tulliuttut Danmarkimut atassuteqarnermi ineriartorneq sunnersinnaavaat, kalaallillu akornanni imminut paasinninneq sunnersinnaallugu. Imaassinnaavoq oqariartuutaannit suliaasigullu siunissamut siunniussaqarsinnaasugut.
Saqqummersitsisut tallimaasut tassaapput Martin Brandt Hansen, Paninnguaq Lind Jensen, Paarma Brandt, Inuuteq Storch aamma Maja-Lisa Kehlet. Namminersornerup ukiut qulinngortorsiorneranut atatillugu malunnartitsiniaalluni saqqummersitsinissamut Bolatta Silis-Høeghimit toqqarneqarput. Kalaallit eqqumiitsuliortut tamarmik 30-t ataallugit ukiullit, atortunik assigiinngitsunik periutsinillu assigiinngitsunik suliaqartut, eqqumiitsuliornerup silarsuaani assigiinngissitaartunik takutitseqataasut. Bolatta Silis-Høegh oqarpoq: ”Eqqumiitsuliortut uku arlallit oqaluttuarisaanitsinnit ileqqutsinnillu isumassarsisarsimanerat ersarippoq. Kisianni qanga pereersut qanoruna siumukaataasinnaasut? Sooruna kingumut qiviarneq taama uatsinnut pingaaruteqartigisoq? Qanoq oqariartuut taama pikkunartigisoq pissanganartunngorlugu paasiuminarsarneqarsinnaava?”
Eqqumiitsuliat oqaluttuartuupput, kalaallit ileqqui tunngavigalugit apeqqusiisinnaasut, naalagaaffeqatigiinnermi oqaluttuarisaaneq nunarsuarmullu tamanut isiginnittaaseq tunngavigalugittaaq apeqqusiisinnaasut. Kalaallit Nunaanniit 1970-ikkunni assit, annoraamerngit naqitat qalipaatigissaartut, inuit kakiorneri, aamma qummuattarsuit angisuut saqqummertitsinermi takuneqarsinnaasut ilagaat. Marraq, nersussuup amia, annoraamineq, equutissiat, allunaasat, assit palasillu annoraarsui eqqumiitsuliani atorneqarput.
Nordatlantens Bryggep eqqumiitsuliortoq Bolatta Silis-Høegh saqqummersitsinermik aaqqissuussisoorusunnersoq aperisimavaa, tamatumalu kingorna saqqummersitsineq pilersinneqarsimavoq. Namminersorlutik Oqartussat ukiut qulinngortorsiornerannut aamma Namminersornerullutik Oqartussat ukiut 40-nngortorsiorlugit nalliuttorsiutiginerannut atatinneqarpoq. Eqqumiitsuliortut tallimaasut peroriartornerisa nalaannut tulluartumik qulequtaqarpoq. Taamani Namminersornerullutik Oqartussat aamma Namminersorlutik Oqartussat pileruttorneranni peroriartorsimapput, siunissamilu ukiunut inuuffigisassaannut qulequtaq atassuteqarluni. Ukiut inuuffiit Kalaallit Nunaata namminersortunngorfigilersinnaasassai.
Siunissamik takorluuineq oqallinnerlu saqqummersitsinerup aallartissagaa Nuummi Eqqumiitsulianik Saqqummersitsiviup neriuutigaa. Katersugaasiviup pisortaa Nivi Christensen tassunga atatillugu oqarpoq: ”Kalaallit Nunaat maanna piffissami pissanganartumiippoq, kinguaariit inuusuttut namminersorneq eqqutiinnarnagu namminersornerulli pilersinneqarnissaanut peqataasussaallutik. Eqqarsarluarnissaq pisariaqarpoq, taamaammallu neriuutigaarput saqqummersitsineq oqallititseqataasinnaassasoq.”
Siorna Nordatlantens Brygge saqqumersitsinermut atatillugu aviisiliorput taannalu Nuummi Eqqumiitsulianik Saqqummersitsivimmi saqqummersitsinissamut atatillugu naqiteqqinneqarpoq. Aviisi uani atuarneqarsinnaavoq:
Saqqummersitsineq Namminersorlutik Oqartussanit, Royal Arctic Linemit, Augustinus Fondenimit, NAPA-millu tapersersorneqarpoq.