Nuersaaneq ataatsimoorneruvoq, isumassarsiortitsisarfik, ilinniartitseqatigiiffik, aammalu nuersagassanik, isumassarsianik najoqqutassanillu paarlaasseqatigiiffiulluni.

Martsip ulluisa 22-anniit 25-ata tungaanut Nuummi Eqqumiitsulianik Saqqummersitsivik aamma Nuutoqaq (Nuuk Lokalmuseum) nuersaanermik festivalimik ingerlatsissapput. Nuersagassat, nuersaatit isumassarsiallu nassarlugit paarlaasseqatigiissaagut, assassoqatigiillutalu naapeqatigiissalluta. Nuersaanermik nuannarisaqaruit, qangali nuersaasimallutit imaluunniit aatsaat aallartitsiguit, peqataanissannut tikilluaqqusaavutit. Peqataaneq akeqanngilaq, aammalu peqataaniarluni nalunaarnissaq pisariaqarani.

 

Ataasinngorneq martsip ulluisa 22-at // Alersinik aaqqatinillu nuersaassaagut!

Nuersagassaq nuersaatilllu, aammalu najoqqutassamik peqaruit nassaruk, taava immitsinnut isumassarsioqatigiilluta quinartunik naliginnaasunillu alersiliussaagut.

Sumi: Nuutoqaq (Nuuk Lokalmuseum) // nal. 19-21

 

Marlunngorneq martsip ulluisa 23-at // Nuersaaneq pillugu oqalugiarneq: Liv Aurora

Nuersaajutigaluta Liv Aurora nuersaaneq aamma haute couture pillugit oqaluttuartoq tusarnaassavarput.  Soqutiginnittut tamarmik tikilluaqqusaapput.

Sumi: Nuutoqaq (Nuuk Lokalmuseum) // nal. 19-21

 

Pingasunngorneq martsip ulluisa 24-at // Nuersagassat sinnikut

Nuersagassanik sinnikunik nuersaatinillu nassarit, taava immitsinnut isumassarsioqatigiissaagut, sinnikullu atorlugit alutornartunik assassoqatigiissaagut.

Sumi: Nuummi Eqqumiitsulianik Saqqummersitsivik  // nal. 19-21

 

Sisamanngorneq martsip ulluisa 25-at// Soraareernerup kingorna nuersaajartupallalaarneq

Soraaruit nuersakkatit nassarlugit eqqissisimaariarit. Kaffi, tii kaagillu sassaalliutigineqassapput. Soraaruit saqqummersitsiviliaannassaatit.

Sumi: Nuummi Eqqumiitsulianik Saqqummersitsivik // nal. 15-18