Nuummi Eqqumiitsulianik Saqqummersitsivik suleqatigalugu eqqumiitsuliortup Gudrun Haslep nunani assigiinngitsuni eqqumiitsuliortut allat qaaqqusimavai erfalasulioqqullugit, tulliuvorlu Paarma Brandt. Eqqumiitsuliortut Kalaallit Nunaanniittut avataaninngaanneersullu erfalasoq suunersoq eqqarsaatersuutigalugu, aamma eqqumiitsulianngorlugu suunersoq sammequsimavarput.
Paarma Brandtip erfalasoq ilisarnaatitut suunersoq eqqarsaatersuutigisimavaa. Erfalasoq, inuiaqatigiiussutitsinnut ilisarnaatitut, aammalu kinaassusitsinnut ataatsimoorsinnaassusitsinnullu ilisarnaatitut eqqarsaatersuutigalugu. Namminerlu apeqqutigaa Kalaallit Nunaata erfalasua, Erfalasorput, attugassaanngilluinnarnersoq, attorneqaraangallu erfalasoq susarnersoq, ilisarnaat susarnersoq, aammalu apeqqutigalugu uagut misigissutsigullu susarnersut.
”Qalipaatit aappalaartoq qaqortorlu ukiut hunnorujukkaat arlallit Danmarkimut atasimanitsinnut ilisarnaataapput. Nunasiaateqarneq, akerleriinneq, nikanarsaaneq, kamanneq, immikkoortitsinerlu ilaatigut inuiaqatigiittut kinaassuserput pillugu oqallinnipilorujussuarmi uteqattaarneqartuartumiqulequtarineqartarput. Naalagaaffeqatigiinneq politikkikkut ullutsinni sammineqartuarpoq. Naalagaaffeqatigiinneq ammasumik ingerlanneqartoq, isertukkanik anguniagaqanngitsoq ujartorneqarpoq. Politikki tunngavigalugu eqqortuunissaq aamma politikki tunngavigalugu akerliuneq inuit eqqummaariffigaat”, Paarma Brandtip eqqumiitsuliorluni erfalasuliani pillugu eqqarsaatersuutini taama oqaatigai.
Paarma Brandtip misigissutsit aaliangersimasut tunngavigalugit eqqumiitsuliorluni erfalasuliani aqqutigalugu apeqqusersuivoq. Erfalasorput attorneqaraangat qanoq sunnerneqartarpugut, sunaluuna annaasutut misigisartugut? Aamma inuiaqatigiinnut tunngasunik tunngaveqarluni apeqqusersuivoq. Qalipaatit ilisarnaatillu qanoq pilerseqqissinnaavagut, qanorlu siunissamik pitsaanersumik pilersitsisinnaavugut?