Maajip ulluisa 22-anni Nuummi Eqqumiitsulianik Saqqummersitsiviup ukiut 15-inngortorsiornera, ukioq mannalu katersugaasivittut akuerisatut atuutilerneranut nalliuttorsiorneqassaaq. Erfalasulerlutik, plakatinik akeqanngitsunik, unammisitsinermullu nuummiut qaaqquaat.

2005-imi maajip ulluisa 22-anni Nuummi Eqqumiitsulianik Saqqummersitsivik ammaqqaarpoq. Aappariit suliffiutillit eqqumiitsulianillu katersisut Svend Junge aamma Helene Junge Pedersen taamanikkut namminersorlutik eqqumiitsulianik saqqummersitsivik ammarpaat. Ukioq ataaseq qaangiummat illu eqqumiitsuliallu Nuup Kommunianut Nuummilu innuttaasunut tunniunneqarput.

Katersugaasiviup katersugaatai ullumikkut 1300-t missaannik amerlassuseqarput, taakkunannga 1000-it 2006-imi tunissutinut ilaapput. Ilaqutariit Jungekkut nutaartaa, saqqummersitsivik, aamma tunniuppaat. Ajoraluartumik Svend Jungep toqunerata kingorna 2007-imi aatsaat atoqqaarfissiorneqarsimavoq. Saqqummersitsivittaa Kalaallit Nunaanni kisiartaalluni eqqumiitsulianik saqqummersitsivittut sananeqarsimasutuaavoq.

Katersugaasiviup pisortaa Nivi Christensen oqarpoq: ”Tunissut ullutsinni eqqumiitsulianik katersani Kalaallit Nunaannut attuumassutilinni annerpaajugunartumut tunngaviliisimavoq. Ilaqutariit Jungekkut taamatut katersugaasiviliornerat nukeqassutsimik takutitsineruvoq. Tamanna eqqumiitsuliornerup silarsuaani sinaakkusiisimavoq, eqqumiitsuliorneq pingaarnerpaatut inissinneqarluni. Katersugaasivimmik pilersitsineq inuiaqatigiinni eqqumiitsuliornerup isumaa tapersersorpaa, isumalioqqissaarnissamut itisilerinissamullu inissaqartitsilerluni. 2020 katersugaasivimmut aamma piffissamik nutaamik nalunaaqutsiisuuvoq, Kalaallit Nunaanni eqqumiitsuliornermik katersugaasivinni siullersaalluni pisortatigoortumik akuerisaagami. Akuersineq pitsaasumik tunngaveqarnermik naqissusiivoq,  anguniagaqarlunilu sulinerup imminut akilersinnaaneranik takussutissaalluni.”

Akuerisaaneq pitsaassutsimik naqissusiivoq, takutippaalu katersugaasiviip katersugaasiviit inatsisaani piumasaqaatit malikkai, soorlu nalunaarsuinermut tunngasut, katersinermut tunngasut, eriaginninnermut, ilisimatusarnermut, ineriartornermut ingerlatitseqqiinermullu tunngasut. Akuerisaaneq aamma  katersugaasivinnik pisortatigoortumik akuerisanik naalagaaffimmiillu akuerisanik pitsaanerusumik suleqateqarsinnaanermik periarfissiivoq.

Pisortatigoortumik akuerisaanermi siulersuisoqarnissaq malittarisassanillu aalajangiussaqarsimanissaq aamma piumasaqaataapput. Katersugaasiviup siulittaasui siulliit tallimanik ilaasortaqarput marlunnillu sinniisussaqarluni (malittarisassat malillugit):

Siulittaasoq: Tobias Hjorth Christiansen.
Ilaasortat: Jørgen Chemnitz, Katja Vahl, Peter ’Kujooq’ Kristiansen, Birgit Kleist Pedersen.
Sinniisussat: Aviaaja Rosing Jakobsen, Stine Selmer Andersen

Katersugaasiviup erfalasulernermik nuannisartitsinermillu nalliuttorsiutigineqarnissaa aalajangersimavaa. Soorunami iserneq akeqassanngilaq. Ullormi tassani eqqumiitsuliaq nutaaq ukiunik 15-inngortorsiornermut atatillugu pisiarineqarsimasoq saqqummiunneqassaaq, taassumalu saniatigut saqqummersitsinernit kingullernit plakatinik 100-t akeqanngitsunik agguaassisoqassaaq, katersugaasiviullu pisiniarfianit akissarsiassaqartinneqartumik eqquiniaasitsisoqassalluni.