Eqqumiitsuliortoq Arnannguaq Høegh kisimiitillugu suliaanik saqqummersitsinerit siulliit ilaat maanna ammalerpoq. Tamanna Nuummi Eqqumiitsulianik Saqqummersitsivimmi sisamanngornermi 2022-mi oktobarip 20-ani pissaaq. Det sker torsdag den 20. oktober 2022 på Nuuk Kunstmuseum.

Eqqumiitsuliortoq Arnannguaq Høegh (1956-2020) kalaallini eqqumiitsuliortuni ilinniarsimasuni siulliit ilagaat. Ukiorpassuarni Eqqumiitsuliornermik Ilinniarfimmi aqutsisuunermigut Kalaallit Nunaanni eqqumiitsuliornerup ineriartornerani annertuumik sunniuteqarsimasut ilagaat. Eqqumiitsuliortuni kalaallini Høegh ilisimaneqartut ilagaat, taamaakkaluartorli allaaserineqarpiarsimanngilaq, kisimiitillugulu angisuumik saqqummersitisoqarnikuunani.

Kalaallit Nunaanni eqqumiitsuliornermi Arnannguaq Høegh tunngavilersuisut ilagaat. Aka Høegh Anne-Birthe Hovelu 1970-ikkunni arnat nukittuut eqqumiitsuliornermik ilinniagaqartut ilagisimavaat, taakkununngalu Arnannguaq Høegh ilaavoq. Taamaninngaanniilli Kalaallit Nunaanni eqqumiitsuliornermi pingaarnerit ilaanniilersimasimapput.

Arnannguaq Høegh Holbækimi Kunsthøjskolemi ilinniarsimasuuvoq, Kinngait – Cape Dorsetimi naqiterinermik sannavimmi, Halifaximi Nova Scotia College of Art and Design ilinniarsimasuulluni, Københavnimi Kunstakademiip Grafisk Skoleani ilinniartutut tikeraartuusimalluni taamatuttaarlu Oslomi Kunstakademiimi. Bodil Kaalund ilinniarfigisimavaa, taamanilu Grafisk Værksted, maanna Eqqumiitsuliornermik Ilinniarfiusoq, ammarmat, attuumassuteqarfigilereersimavaa. Siullermik ilinniartitsisutut kingornalu ukiorpassuarni aqutsisutut, tassalu 2020-mi sivikitsumik napparsimareerluni toqunissami tungaanut aqutsisuulluni. Saqqummersitsineq kingumut qiviartuussaaq, ukiorpassuarnilu inuiaqatigiinnut attuumassutilinnik suliaqartarsimaneranik tunngaveqassalluni. Ukiuni 27-ini eqqumiitsuliornermik ilinniarfimmi aqutsisuunerata nalaani, Kalaallit Nunaannilu eqqumiitsuliortunik ilinniartitsisuunerata nalaani.

Arnannguaq Høegh naqiteraluni eqqumiitsuliortarnermigut ilisimaneqarpoq, taannalu eqqumiitsulioriaaseq pikkoriffigilluinnarsimavaa. Eqqumiitsuliai uteqattaarinernik sammisanillu uteqqiinernik ulikkaarput, aammali oqariartuuteqartuullutik, soorlu puisit amii pillugit sunniinissamik suliniutit pillugit saarulliillu tammakarneri pillugit oqariartuutit.

Saqqummersitsinermi eqqumiitsuliat 100-it missaat takutinneqassapput, ilaatigut ilusilersukkat, qalipakkat, mixed-media, titartakkat naqitikkallu. Pisoqaanerit inuusunneranit 1960-ikkut naalerneranninngaanneerput nutaanersaallu toqunissaanut ukiut ikittuinnaat sioqqullugu suliaallutik.

Saqqummersitsineq 2023-mi januaarip tungaanut takusarneqarsinnaassaaq, saqqummersitsinerlu Arnannguaq Høeghip kingornussisui suleqatigalugit pilersinneqarluni.