Eqqumiitsuliortup kalaallip Anne-Birthe Hovep (1951-2012) suliaata tamangajaasa pisiarinissaanut Ny Carlsbergfondet aningaasaliivoq. Eqqumiitsuliat 600-t sinnerpaat, ilisimasallu malillugit maannamut kalaallit eqqumiitsuliaannik ataatsikkut pisinermi annersaalluni.

Statens Museum for Kunst, Nunatta Katersugaasivia Allagaateqarfialu, Nunatta Eqqumiitsulianik Saqqummersitsiviata Aningaasaateqarfia, aamma Nuummi Eqqumiitsulianik Saqqummersitsivik ataatsimoorlutik pisisuupput.

Suliamik aqutsisoq, Nivi Christensen, Nuummi Eqqumiitsulianik Saqqummersitsivimmeersoq oqarpoq: ”Pissanganaqaaq, annertoqalunilu! Suliarpassuami Kalaallit Nunaannut utertinneqarnissai, naggataagullu Nunatta Eqqumiitsulianik Saqqummersitsivianiilernissai Anne-Birthe Hovep nammineq kissaatigisarsimavaa. Tamanna piviusunngortissinnaanngorneranut Ny Carlsbergfondet aamma Anne-Birthe Hovep ilaqutai qutsavigaagut.”

Eqqumiitsuliat 2015-imi nittartagaq www.annebirthehove.com aqqutigalugu tamanut saqqummiunneqarput, nittartakkamiittullu annerpaartaat pisiarineqartunut ilaallutik. Suliat katillugit 600-t sinnerpaat. Amerlanerit naqitigaapput, atuakkat titartakkanik imallit, naqitigassaliat, qalipakkat, meqqutit kigartuutit il.il. Suleqatigiinnerup siammasinnera aamma Ny Carlsbergfondet-ip aningaasaliinera peqqutaallutik taamatut pisinissaq aatsaat anguneqarsinnaasimavoq.

Anne-Birthe Hove kalaallini eqqumiitsuliortuni takusanik suliarinneqqittartuni sukuiaasartunilu siulliit ilagisimavaat, taamaammallu eqqumiitsuliornikkut nalunaajaataa inuiaqatigiinnut nalitoorujussuulluni. Kalaallit Nunaata Danmarkillu akornanni katersugaasivilerinermi taama siammasitsigisumi ataatsimut pisineq taama ittoq aatsaat siullerpaamik pissaaq. Tassuunnannarluunniit eqqumiitsuliat katersaat taakku qanoq pingaaruteqartigineri takuneqarsinnaavoq. Anne-Birthe Hove Kalaallit Nunaanni piffissani pingaarutilinni suliaqartarsimavoq. Kalaallit Nunaata amt-itut inneraninngaanniit, Namminersornerulerneq, 2009-milu Namminersulerneq pillugu isummersornera arlalitsigut malinnaavigineqarsinnaavoq. Eqqumiitsuliornikkut nalunaajaaneq immikkuullarissuuvoq, maanna kingunissamut qulakkeerneqarsimalertoq.

Hove Kalaallit Nunaanni eqqumiitsuliortuni immikkuullarinnerit ilagisimavaat. Eqqumiitsuliornermik Ilinniarfik, Nunatsinni Eqqumiitsuliortut Peqatigiiffiat Kimik, aamma Nunatta Eqqumiitsulianik Saqqummersitsiviata Aningaasaateqarfia aqqutigalugit Kalaallit Nunaanni eqqumiitsuliornermi pimoorussisuusimavoq. Danmarkimi aamma eqqumiitsuliortut peqatigiiffiat Koloristerne ilaasortaaffigisimavaa. Kalaallit Nunaanni eqqumiitsuliorneq ukiuni 40-ni sunniuteqarfisimavaa, Kalaallit Nunaanni piffissaasoq allanngorarfioqisoq. Kalaallit eqqumiitsuliortut inuusuttut Hove isumassarsiorfittut maligassiuisutullu ulloq manna tikillugu nersornarisarpaat.

Eqqumiitsuliat katersaat maanna Bornholmimiipput, piffissamilu aggersumi Kalaallit Nunaannut nassiunneqassallutik. Kalaallit Nunaannut apuuppata katersugaasivinnut agguaanneqassapput nalunaarsorneqarlutillu.