Nuummi Eqqumiitsulianik saqqummersitsiviup aamma eqqumiitsuliortup Gudrun Haslep suleqatigiissutaanni Erfalasoq//Flag-imi erfalasuni eqqumiitsuliani tulliuttoq Jette Hye Jin Mortensenip suliarisimavaa, qulequtaraalu “SLOW LIQUID / ANAANAGA”.

Jette Hye Jin Mortensen (in. 1980) Koreami inunngorsimavoq Danmarkimilu najugaqarluni. Suliai inuit ataasiakkaat ataatsimoortullu akornanni nikerarnermik ujartuinerupput misissuinerullutillu. Inuup ilaatigut avatangiisiminik sunniisinnaassusaa paarlattuanillu, qanoq avatangiisit inummut ilaanersut. Siusinnerusukkut suliamini meeravissiartaarneq sammisimavaa, nammineq meerarsiaasutut oqaluttuassartani aqqutigalugu ilaatigullu nunat assigiinngitsut akornanni pisartut aqqutigalugit. Taamaattumik eqqumiitsuliorneq aqqutigalugu inuttut kingunerlutitsineq tarrnikkullu peqqissarneq sammisarpai, aammali kingunerlutitsineq tarnikkullu peqqissarneq annerusumik inissisimaffii sammisarpai.

Hye Jin Mortensenip eqqumiitsuliai qaleriiaanngorlugit suliaasarput. Qeqqussanik apummillu allaateqarluni erfalasumi ”Anaanaga” allaqqavoq. Erfalasoq assigiinngitsunik marlunnik aallaaveqarpoq. Siullermik meeqqat kalaallit 1950-ikkunni immikkut toqqagaallutik ilaquttaminniit peerneqarnerat pillugu 2020-mi Danmarkimi naalakkersuisut akisussaanerminnik akuersinerat aallaavigivaa, atasumillu ullumikkut meeqqat kalaallit 1950-ikkunniit 1970-ikkut tungaannut qallunaanit aappariinnit meeravissianngortinneqartarsi-manerisa oqallisigineqarnerat aallaavigalugu.

Aappaattullu Jette Hye Jin Mortensenip meeraqqaatiminut anaananngorami DNA-testernera aallaaviuvoq. Meerarsiartaarineqarami siullertut Koreameersuusoq testip takutippaa, aammali procenterpaalutigut japanimeersuusoq takuneqarsinnaasimavoq. Qanga Japanip aamma Koreap oqaluttuassartaat aattaqaqaaq. ”Koreamiillunga buddhistit naalaffii qisuusut pulaarlugit allagartaanni allaqqasarput ”… burned down by Japanese, restored in…”, Hye Jin Mortensen oqarpoq. Nangillugu oqarpoq, nunasiaateqarnerup aqqani nakuuserneq saassussinerillu aavani takuneqarsinnaapput.

”Soorunami misigissutsikkut ataatsimoorlunilu ikiligaanerit nunap, immap, inuullu sananeqaatai soqutiginngilaat: nunap ilaanut nutaanut aanaarusaarput/koorusaarput, soorlu slow liquid (seererusaarput)”.

Qanga qangarsuaq qeqertat ilaanni Japaninngorumaartuni, immap bakteeriaaneersoq enzym ”Zobelli galactanivorans” inuup naavatigoorluni inuup sananeqaatasnut pivoq. Enzymi immap naasuinit qeqqussanillu inuussutissartalinnik iioraasinnaavoq. Soorlumi imarsuaq inuup timaanut pulaannavittoq, Jette Hye Jin Mortensen allappoq. Aamma oqaluttuarineqartarpoq, qanga inuit arferit alaatsinaattaraat. Arferinngooq piaqqigaangamik piaqqatik inuussutissaqartikkumallugit immap naasuinik qeqquarpassuarnillu nerisarput. Tassunga ilisimannilernerup Koreami qeqqussanik anaanganngorlaanut suppaliaq miyeok-guk ileqquliutsissimavaa.

 

Recipe

dried wakame seaweed
soy sauce
minced garlic
sesame oil
 

Soak Rinse Fry Soak Stir Season.

 

Jette Hye Jin Mortensenip eqqumiitsuliatut erfalasuliamini qaleriiaattunik misissuivoq; inuup sananeqaataa anaananngornerlu, Oqaluttuarisaanermi ataatsimoorfeqarneq, nunat, kinguaariinnilu sananeqaatitsinniittut misissorpai. Avatangiisit kinguaariinni arriitsumik inuit sananeqaataasigut pulajartortarnerat, imaluunniit oqaluttuarisaanerup tumai sananeqaatitsinnut pulasarneri. Pulasarnerit taakku ersersippaat sunaluunniit imaasiallaannaq minguitsumik ajornaatsumillu pineq ajortoq, akuugaasumilli uivernerillu aqqutigalugit pisartoq, ataatsikkoortumik kingunilutsitsinertaqarluni katsorsarnartortaqarlunilu.

Erfalasoq 2021-imi apriilip ingerlanerani amuneqartassaaq.