Kalaallit tupilaataat pillugit atuakkiaq NUTAAQ meeqqanut qalipagassartaqarlunilu oqaluttuassartaqartoq
Stine Lundberg Hansen oqaluttualiortuuvoq, Maria Bach Kreutzmann assiliartalersuisuuvoq, aamma kalaallisut, qallunaatut tuluttullu allagaavoq.
Atuagannguaq una meeqqanut qalipagassartaqarlunilu oqaluttuassartaqartoq Nuummi Eqqumiitsulianik Saqqummersitsiviup tupilaat katersugaatai isumassarsiorfigalugit atuakkiaavoq. Maria Bach Kreutzmannimit, kalaallit oqaluttuatoqaanni toornat, uumasut inuunngitsullu pillugit atuagarsuarmik najoqqutassiaasumik aaqqissuisuusumit, assiliartalersugaavoq.
Atuagannguaq Nuummi Eqqumiitsulianik Saqqummersitsivik milik publishingilu suleqatigalugit saqqummersinneqarpoq, saqqummersitsinerlu Den Grønlandske Fondimit Namminersorlutillu Oqartussat kultureqarnermut aningaasaliissutaannit tapiiffigineqarpoq.
Akeraq toqunniarlugu tupilak aallartinneqartarpoq. Taamaaliornerli navianartoqartarpoq tupilaap toqunniakkani pilersitsisuminit pissaaneqarnerugaangat pilersitsisuni uterluni toquttarmagu. Europamiut alapernaatsut tikissimalermata kalaallit eqqumiitsuliortui tupilaap ilusaa takutinniarlugu ilusilersuisalerput, taakkualu saarngit ujaqqallu atorlugit ilusilersukkat ullumikkut nalunngilagut.
MEEQQAT ULLUAT // Saqqummersitsineq, workshop tupilannillu ujarlertitsineq
Juunip aallaqqaataanut, Meeqqat Ulluannut, atatillugu Tupilak kalaallisut, qallunaatut tuluttullu saqqummersinneqassaaq. Maria Kreutzmann peqatigalugu tupilannik titartaalluni qiortaallunilu workshoppimut meeqqat meerarpaluttunillu nuannarisallit peqataasinnaapput. Tamanna pissaaq nal. 9.00 Sermersuup Facebookimi toqqaannartumik aallakaatitsineratigut. Workshoppi Nuummi Eqqumiitsulianik Saqqummersitsiviup aamma milik publishingip Facebookimi quppernerisigut malinnaavigineqarsinnaassaaq.
Kiisalu nal. 13-17 Nuummi Eqqumiitsulianik Saqqummersitsivimmi tupilannik atuakkameersunik ujarleriartortoqarnissaavoq.