Naqiterisarfik Epsilon suleqatigalugu Nuummi Eqqumiitsulianik Saqqummersitsivik Kalaallit Nunaanni eqqumiitsuliorneq pillugu atuagaaqqanik arfineq pingasunik, meeqqat atuarfiinut tulluarsakkanik, saqqummersitsivoq.
Atuagaaqqani Nuummi Eqqumiitsulianik Saqqummersitsivimmi aammalu Nunatta Katersugaasiviani katersat tunngavigineqarput. Atuagaaqqat immikkut tamarmik Kalaallit Nunaanni eqqumiitsuliornermi aalajangersimasumik sammisaqarput. Sammisat 1850 sioqqullugu atortunik pinnersaasarnerminngaanniit ullutsinni eqqumiitsuliornermut, ilaatigut nunasiaateqartarnermut tunngasunut, siammasissuseqarput.
”Kalaallit Nunaanni eqqumiitsuliorneq pillugu atuartitsissutit piumaneqaqaat, taamaammallu atuagaarannguit arfineq pingasut nunatsinni eqqumiitsuliornermut tunngasut maanna kalaallisut qallunaatullu saqqummersinneri nuannaarutigeqaarput. Eqqumiitsuliorneq pillugu kalaallisut oqaloqatigiinnissamut periarfissiilluarput, atuartunut tamanut,” Nivi Christensen, Nuummi Eqqumiitsulianik Saqqummersitsivimmi aqutsisoq oqarpoq.
Atuagaaqqani ilaatigut eqqumiitsuliat inuiaqatigiit pillugit apeqqusersuisut sammineqarput, soorlu namminersornissamut naalagaaffeqatigiinnermullu tunngasut. Eqqumiitsuliortut assigiinngitsut, soorlu Inuk Silis Høegh, Pia Arke, Martin Brandt aamma Jessie Kleemann aallaavigalugit sammineqarput. Pinngortitap atorneqartarnera sammineqarpoq. Naqiteraluni eqqumiitsuliortarneq Kalaallit Nunaanni eqqumiitsuliornermik ukiuni 250-ini sunniisimasoq sammisat aamma ilagaat. Atuagaaqqani arfineq pingasuni sammisat aalajangersimasuupput, ataasiakkaarlugit sammineqarsinnaasut imaluunniit atuagaaqqat sinneri aamma atorlugit sammineqarsinnaasut. Oqallinnissamut periarfissat ilaapput, aammalu eqqumiitsuliarpassuit Kalaallit Nunaanneersut pisoqaanerit nutaanerusullu assigi ilaallutik.
Atuagaaqqat naqiterisarfimmit Epsilon-imit saqqummersinneqarput, katersugaasivinni paasissutissanik tunngasunik ”Vild med viden FOKUS” ataani meeqqanut saqqummersitsisartoq. Atuagaaqqat meeqqanut qulingiluanit aqqaneq marlunnik ukiulinnut tulluarsagaapput, kalaallisut qallunaatullu saqqummersinneqarlutik. Ilinniusiorfik suleqatigalugu atuagaaqqat Kalaallit Nunaanni meeqqat atuarfiinut agguaanneqarput. Atuagaaqqat sumiiffinni assigiinngitsuni Kalaallit Nunaanni Danmarkimilu pisiarineqarsinnaapput, ilaatigut Nuummi Eqqumiitsulianik Saqqummersitsivimmi aammalu Nunatta Katersugaasiviani.
Atuagaaqqat saqqummersinneri 15. juni fondimit aamma Namminersorlutik Oqartussat Kulturimik aningaasaliissutaanit taperneqarput.
(April 2023)