Eqqumiitsuliorluni suliaq immikkut malunnaatilik Augustinus Fonden-imit tapiissutinik qulakkeerneqarpoq
Aningaasaliissuterpassuit Augustinus Fonden-imeersut pissutaallutik Melting Barricades, Asmund Havsteen-Mikkelsen-imit Inuk Silis Høegh-millu pilersinneqarsimasoq, Nuummi Eqqumiitsulianik Saqqummersitsiviup ataatsimut pisiarisinnaalerpaa.
Nuup qeqqani inuit 2004-mi aqqusinermi takusaat eqqumiippoq. Kalaallit erfalasuata ataani angutit sakkutuutut tamanik atortullit aqqusinikkut ingerlaarput, sakkutuut tupiat napparneqarsimavoq, sakkutuullu biilii unissimallutik. Kalaallit Nunaata sakkutooqarfianut nalunaarluni allatsittoqarsinnaasoq megafonit atorlugit nalunaarutigineqarpoq. Pisoq eqqumiitsuliorluni suliniutip ilagivaa pineqartup ilagaa, nunap TV-atigut, aviisiisigut, Nuummilu aqqusinermi paasisitsiniaanermut ilaatinneqartoq, aammalu kingusinnerusukkut Københavnimi ikerasanni qaannat aallaasersorlugit takutinneqarlutik. Eqqumiitsuliorluni suliniutip qulequtaraa: Melting Barricades. Eqqumiitsuliorluni taamatut suliaqarneq Kalaallit Nunaanni siullersaavoq. Nunasiaataasimanerup kingorna ileqqorineqartunik isornartorsiuivoq, mitakujunnertalimmik quiasunnertalerlugu suliarineqarsimalluni. Sumiiffimmi aalajangersimasumiitinneqarpoq, aammali Kalaallit Nunaata Danmarkillu akornanni aalajangersimasuunngitsumiilluni, piviusuusaartinneqartumik inissisimalluni. Suliniut Katuami aamma Københavnimi Nordatlantens Bryggemi saqqummersitsinernik malitseqarpoq.
Eqqumiitsuliortut Høegh aamma Havsteen-Mikkelsen suliniummi immikkoortut tamaasa uppernarsarlugit pivaat tamaasalu ataatsimoortillugit katersarisimallugit. Taamaattumik suliniummiittut tamaasa, videoliat, plakaatit, passit, sakkutuunngorniarnissamut qinnuteqarnermut immersugassat, erfalasut, paasisitsiniaanermi meqqit nipitittakkat, annanniarnermut najoqqutassaq, assit, aviisini allaaserisat, tupeq, uniformit, titartaqqaakkat, allarpassuillu katillugit katersat 59-it pisiarineqarsinnaasimapput. Augustinus Fondenimit aningaasanik tapiiffigineqarnikkut suliniut pisiarineqarsinnaalerpoq, kingunissamullu pigineqarsinnaalerluni. Kalaallit Nunaanni eqqumiitsulianik saqqummersitsiviup ullut ilaanni piviusunngortinneqarnerani katersat tunniunneqarnissaat siunertaralugu pisiarineqarput.
”Melting Barrricades piviusuunngitsumik sakkutuuliorneruvoq, Namminersornerullutik Oqartussat 2004-mi ukiunik 25-nngortorsiorneranut atatillugu sakkutooqarneq pillugu oqallinnerujussuarmik pilersitsoq, namminersortuuneq, nunasiaataasimasutut Danmarkimut attuumassuteqarneq, aamma kalaallit ataatsimut pingaartitaat pillugit qallinnerujussuarmik pilersitsivoq, pissutsinillu piviusuusaartitsilluni. Suliniut Kalaallit Nunaanni eqqumiitsuliornermi pingaarnerpaat ilagaat, taamaammallu ataqqinningaartumik tulluusimaarnartumillu maanna Nuummi Eqqumiitsulianik Saqqummersitsivimmi katersat ilagilissavaat. Eqqumiitsuliortut suleqatiginerannut Augustinus Fondenimillu tapiissutinut qujanarujussuaq.” – Saqqummersitsivimmi aqutsisoq Nivi Christensen
Pisinerup 2024-mi piviusunngortinneqarsinnaanera naleqqulluinnarpoq. Melting Barricades ukiunik 20-nngortorsiorpoq, Namminersornerulerneq ukiunik 45-nngortorsiorpoq, taamaalillunilu aamma Namminersornerup eqqunneqarnera ukiunik 15-inngortorsiorluni.
”Suliniut taamani ukiut 20-t matuma siorna saqqummiunneqarsimanermisulli ullumikkumut aamma suli piffissamut attuumassuteqarpoq. Suliniutaavoq naliminit siuarsimanerusoq. Suliniut tunngavigalugu inuiaqatigiinni unammillernartut pillugit oqallititsinermik annertuumik pilersitsisimanera kikkunillu tamanik peqataalersitsisimanera assorsuaq nersualaarnartuuvoq. Eqqumiitsuliorluni suliaq immikkut malunnaateqartuuvoq, kingunissatsinnut pigineqarlunilu inaalilluarneqartariaqartoq.”
Qilanaartuutitut Nuummi Eqqumiitsulianik Saqqummersitsivimmi videoliaq Sooq akersuuttugut Unnuk Kulturisiorfimmi takutinneqarpoq, isiginnaartunit nuannarineqarluartumik. Katersat ilaat 2024-mi upernaap ingerlanerani saqqummersinneqarsinnaasut saqqummersitsivimmit naatsorsuutigineqarpoq.
Nutaarsiassaq: apriili 2024.